اسلام آباد : کور کمانڈر منگلا لیٍفٹیننٹ جنرل ایمن بلال صفدر قبل از وقت ریٹائر کر دیے گئے ۔ وفاقی کابینہ نے ان کی ریٹائر منٹ کی درخواست منظور کر لی ۔ ذرائع کے مطابق انہوں نے وزارت دفاع کے ذریعے وفاقی حکومت کو درخواست بھیجی تھی جس میں کہا گیا تھا کہ وہ ذاتی وجوہات کے باعث مزید خدمات انجام نہیں دے سکتے ۔ اس درخواست کو فوری طور پر منظور کر لیا گیا ۔
اس سے پہلے سوشل میڈیا پر ان کے بارے میں یہ اطلاعات گردش کر رہی تھیں کہ ان سے استعفیٰ لیا جا رہا ہے ۔ لیٍفٹیننٹ جنرل ایمن بلال صفدر کو اکتوبر 2022 میں میجر جنرل کے عہدے سے لیفٹیننٹ جنرل کے عہدے پر ترقی دی گئی تھی ۔
سینیئر صحافی عمر چیمہ نے اپنے وی لاگ میں کہا ہے کہ کورکمانڈر منگلا موجودہ سیٹ اپ سے خوش نہیں تھے ۔ وہ اپنے نظریات کا کھل کر اظہار کرتے تھے اور ان کی گفتگو اعلیٰ قیادت تک پہنچ گئی جس کے بعد ان سے استعفا لے لیا گیا ۔ بعض ذرائع کے مطابق ان کے خلاف کچھ ایسے شواہد بھی ملے جو ڈسپلن کے منافی تھے ۔ عمر چیمہ کا کہنا ہے کہ یہ دراصل ایک پیغام بھی ہے کہ اگر کچھ اور لوگ بھی ایسی سرگرمیوں کا سوچ رہے ہیں تو ان کے خلا ف بھی کارروائی ہو سکتی ہے ۔ ان کے مطابق اس بات کا امکان ہے کہ آنے والے دنوں میں کسی اور کور کمانڈر سے بھی استعفا لیا جا سکتا ہے ۔
فیس بک کمینٹ