اعلیٰ پیمانے پر تبادلے:لیفٹیننٹ جنرل فیض حمید کور کمانڈر بہاولپور تعینات : عمران خان کا جلسہ لاہور منتقل

راول پنڈی : پاک فوج میں اعلی پیمانے پر تبادلوں اور تقرریوں کا اعلان کیا گیا ہے ۔ فوج کے شعبہ تعلقات عامہ ( آئی ایس پی آر) کے مطابق لیفٹیننٹ جنرل فیض حمید کور کمانڈر بہاولپور تعینات کیا گیا ہے جبکہ اس سے قبل وہ کور کمانڈر پشاور تعینات تھے۔
آئی ایس پی آر نے بتایا کہ لیفٹیننٹ جنرل سردار حسن اظہر حیات کور کمانڈر پشاور تعینات کیا گیا ہے، اس کے علاوہ لیفٹیننٹ جنرل خالد ضیا ملٹری سیکرٹری پاکستان آرمی ہوں گے۔
اس سے قبل 2019 سے 2021 تک لیفٹیننٹ جنرل فیض خفیہ ادارے آئی ایس آئی کے سربراہ رہے تھے۔
دوسری جانب سابق وزیر اعظم عمران خان کی جماعت تحریک انصاف نے ٹوئٹر پر ایک پیغام میں بتایا ہے کہ ان کی جانب سے 13 اگست کو لاہور کے ہاکی سٹیڈیم میں جلسہ کیا جائے گا۔اس سے قبل تحریک انصاف نے 14 اگست کو اسلام آباد میں جلسہ کرنے کا اعلان کیا تھا تاہم اس کے مقام اور شیڈول میں تبدیل کیا گیا ہے۔خیال رہے کہ رہنما تحریک انصاف فواد چوہدری نے کہا تھا کہ اس جلسے میں حکومت کو الیکشن کی تاریخ دینے کی ڈیڈلائن دی جائے گی۔