آج سینیئر صحافی اور اے پی پی کے سابق ایگزیکٹو ڈائریکٹر غنی چوہدری کی چوتھی برسی ہے

ملتان : گردوپیش نیوز ۔رضی الدین رضی سے ۔ نام ور صحافی ملتان پریس کلب کے سابق صدر اور ا ے پی پی کے سابق ایگزیکٹو ڈائریکٹر غنی چوہدری کی آج چوتھی برسی منائی جا رہی ہے ان کا چھبیس اگست 2021 جمعرات کو طویل علالت کے بعد بہاولپور میں انتقال ہو گیا تھا ۔ ان کی عمر 79 برس تھی اور وہ دو برس سے صاحب فراش تھے ۔
غنی چوہدر ی کا شمارپاکستان کے نام ور صحافیوں میں ہوتا تھا ۔ انہوں نے پاکستان ٹائمز سے اپنے صحافتی کیریئر کا آغاز کیا ۔ وہ 1964 میں ایسوسی ایٹڈ پریس آف پاکستان ( اے پی پی ) سے منسلک ہوئے اور 34 برس تک اس ادارے کے ساتھ وابستہ رہے ۔
انہوں نے اے پی پی کے قائم مقام ڈی جی کی حیثیت سے بھی خدمات انجام دیں ۔1993 سے 1997 تک وہ اے پی پی لندن آفس میں تعینات رہے ۔ انہوں نے اے پی پی ملتان کے بیورو چیف کی حیثیت سے بھی کام کیا اور انہی کی کوششوں سے اے پی پی ملتان آفس کے لیے وہ زمین حاصل ہوئی جس پر آج اے پی پی ملتان کا دفتر قائم ہے ۔