اسلام آباد:پاکستان تحریک انصاف کے انتخابی نشان کیس کے فیصلے کے بعد عدلیہ کے خلاف سوشل میڈیا پر مہم چلانے والوں کے گرد گھیرا تنگ کردیا گیا، تحقیقات کے دوران 500 سے زائد اکاؤنٹس کی نشاندہی کردی گئی ہے۔
نگران وزیراطلاعات مرتضی سولنگی کا کہنا تھا کہ پاکستان تحریک انصاف کے انتخابی نشان سے متعلق کیس میں متفقہ فیصلے کے بعد سپریم کورٹ کے ججوں کیخلاف گھٹیا اور غلیظ مہم شروع کرنے والوں کی نشاندہی کر لی گئی ہے۔
وفاقی تحقیقاتی ادارے (ایف آئی اے) کے ڈائریکٹر آپریشنز وقار الدین نے بتایا کہ 500 سے زائد سوشل میڈیا اکاؤنٹس کی نشاندہی ہوگئی ہے۔
انہوں نے بتایا کہ مزید سوشل میڈیا اکاؤنٹس کی مانیٹرنگ جاری ہے، ان تمام افراد کو قانون کے دائرے میں لایا جائے گا۔
واضح رہے کہ سپریم کورٹ میں انتخابی نشان سے متعلق پاکستان تحریک انصاف کے کیس میں متفقہ فیصلہ آنے کے بعد سوشل میڈیا پر عدلیہ کے خلاف ایک مہم شروع ہو گئی تھی۔
سوشل میڈیا پر عدلیہ مخالف مہم میں ملوث عناصر کی نشاندہی کیلئے جے آئی ٹی تشکیل دی گئی تھی جبکہ عدلیہ کے خلاف مہم میں ملوث عناصر کے خلاف کارروائی کے دوران مہم میں شامل کئی سو اکاؤنٹس بند بھی کیے گئے تھے۔
(بشکریہ: جیو نیوز)
فیس بک کمینٹ