ممبئی : بھارت کی لیجنڈری گلوکارہ 92 سالہ لتا منگیشکر کی صحت ایک بار پھر تشویش ناک ہوگئی اور انہیں ایک ہفتے بعد دوبارہ وینٹی لیٹر پر منتقل کردیا گیا۔لتا منگیشکر گزشتہ ماہ 8 جنوری کو کورونا کا شکار ہوئی تھیں اور انہیں ’نمونیا‘ بخار بھی تھا اور وہ تب سے اب تک ہسپتال میں زیر علاج ہیں۔
تقریبا 20 دن تک انہیں انتہائی تشویش ناک حالت میں انتائی نگہداشت کے وارڈ (آئی سی یو) میں وینٹی لیٹر پر رکھا گیا تھا مگر گزشتہ ہفتے ان کی صحت میں بہتری کے بعد انہیں وینٹی لیٹر سے ہٹاکر آکسیجن پر رکھا گیا تھا۔
مگر اب ایک بار پھر ان کی صحت تشویش ناک ہوگئی اور انہیں دوبارہ وینٹی لیٹر پر شفٹ کردیا گیا۔
’انڈین ایکسپریس‘ نے اپنی خبر میں ممبئی کے بریچ ہسپتال کے ڈاکٹر پرتت سمدانی کا حوالہ دیتے ہوئے بتایا کہ لتا منگیشر کو دوبارہ 5 فروری کو وینٹی لیٹر پر شفٹ کردیا گیا اور ان کی صحت اچانک تشویش ناک ہوگئی۔ڈاکٹرز کے مطابق لتا منگیشر کو گزشتہ ہفتے وینٹی لیٹر سے اتار کر آئی سی یو میں ہی رکھا گیا تھا مگر پھر ان کی اچانک صحت خراب ہوگئی۔
اسی حوالے سے ’ہندوستان ٹائمز‘ نے بھی اپنی رپورٹ میں بتایا کہ صحت میں خرابی کے باعث دوبارہ لیجنڈری گلوکارہ کو وینٹی لیٹر پر شفٹ کردیا گیا۔گزشتہ ہفتے ریاست مہاراشٹر کے وزیر صحت راجیش ٹوپے نے کہا تھا کہ لیجنڈری گلوکارہ 92 سالہ لتا منگیشکر 21 دن بعد ’کورونا و نمونیا‘ سے صحت یاب ہوگئیں۔
بعد ازاں لتا منگیشکر کے اہل خانہ نے بھی تصدیق کی تھی کہ لیجنڈری گلوکارہ صحت یاب ہوگئیں اور انہیں وینٹی لیٹر سے بھی ہٹا دیا گیا مگر ساتھ ہی کہا تھا کہ گلوکارہ مزید کئی دن تک آئی سی یو میں رہیں گی۔اب دوبارہ انہیں آئی سی یو کے وینٹی لیٹر پر منتقل کردیا گیا، تاہم فوری طور پر یہ واضح نہیں ہو سکا کہ کیا گلوکارہ تاحال کورونا میں مبتلا ہیں یا نہیں؟
لتا منگیشکر کو زائد العمری کی وجہ سے سانس لینے میں تکلیف کا دیرینہ مسئلہ ہے اور انہیں پہلے بھی سانس میں مشکل کے باعث ہسپتال داخل کرایا جاتا رہا ہے۔
سال 2019 میں بھی لتا منگیشکر ایک ماہ تک سانس میں تکلیف کے باعث ہسپتال میں زیر علاج رہی تھیں، ابھی بھی ڈاکٹرز نے پہلے ہی واضح کیا تھا کہ ضعیف العمری کی وجہ سے انہیں کئی دن تک ہسپتال میں رکھا جا سکتا ہے۔
لتا منگیشکر کی مکمل صحت یابی کے لیے بھارت بھر میں ان کے لیے جہاں خصوصی دعائیں کی جا رہی ہیں، وہیں ان کے لیے مندروں سمیت دیگر مذہبی مقامات پر خصوصی عبادتوں اور دعائوں کا اہتمام بھی کیا جا رہا ہے۔
ان کی صحت کے حوالے سے پھیلنے والی خبروں پر اہل خانہ اور ڈاکٹرز نے بھی برہمی کا اظہار کیا تھا جب کہ مرکزی وزیر سمرتی ایرانی نے بھی لوگوں کو ان سے متعلق جھوٹی خبریں نہ پھیلانے کی اپیل کی تھی۔لیجنڈری گلوکارہ کو سانس لینے میں مشکلات کا مسئلہ دیرینہ ہے، انہیں دسمبر 2019 میں بھی سانس لینے میں تکلیف کے باعث ایک ماہ تک ہسپتال میں رکھا گیا تھا۔
لتا منگیشکر کو بھارت کی ہر دور کی مقبول گلوکارہ مانا جاتا ہے، وہ پاکستان کے علاوہ دیگر جنوبی ایشیائی ممالک میں بھی یکساں مقبول ہے۔ریاست مدھیا پردیش کے شہر اندور میں 28 ستمبر 1929 کو پید اہونے والی لتا منگیشکر کو ان کی گلوکاری کے عوض بھارت کے بڑے سول ایوارڈز سمیت انہیں متعدد ایوارڈز سے بھی نوازا جاچکا ہے۔
( بشکریہ : ڈان نیوز )