پرویز ہود بھائی کے بہنوئی ، معروف دانشور جاوید بھٹو امریکہ میں قتل

واشنگٹن: جنوب مشرقی واشنگٹن میں اسٹور کے باہر فائرنگ سے اسکالر اور فلسفی 64 سالہ جاوید بھٹو جاں بحق ہوگئے ہیں۔ امریکی اخبار واشنگٹن پوسٹ کی رپورٹ کے مطابق پولیس نے جاوید بھٹو کے قتل کے الزام میں 45 سالہ شخص ہلمین جورڈن کو حراست میں لے لیا ہے۔جاوید بھٹو کو صبح 11 بجے کے قریب فائرنگ کا نشانہ بنایا گیا۔ حملہ آور مبینہ طور پر ان کا پڑوسی ہے اور ان کا جاوید بھٹو کے ساتھ کوئی تنازع چل رہا تھا۔دوسری جانب انگریزی اخبار ایکسپریس ٹریبیون نے جاوید بھٹو کے اہل خانہ کے حوالے سے بتایا ہے کہ ’حملہ آور بہت زیادہ شراب پیتا تھا اور اکثر بہت چلاتا اور عجیب رویہ رکھتا تھا۔ جاوید بھٹو نے حال ہی میں ان کے خلاف عمارت کے مالک مکان سے شکایت کی تھی‘۔جاوید بھٹو صحافی نفیسہ ہود بھائی کے شوہر اور معروف پاکستانی ماہر طبیعات پرویز ہود بھائی کے بہنوئی تھے۔ جاوید بھٹو امریکہ منتقل ہونے سے قبل سندھ یونیورسٹی میں شعبہ فلسفہ کے سربراہ کے طور پر بھی خدمات انجام دے چکے تھے۔ جاوید بھٹو کی موت پر مختلف صحافیوں اور دانشوروں نے دکھ کا اظہار کیا اور ٹوئٹر پر تعزیتی پیغامات پوسٹ کیے۔