رحیم یار خان : وزیر ریلوے شیخ رشید احمد نے بی بی سی کو بتایا ہے کہ حادثے کا شکار ہونے والی ٹرین کے مسافروں میں تبلیغی اجتماع میں جانے والے افراد بھی شامل تھے جو لاہور اجتماع کے لیے سفر کر رہے تھے ۔
’مسافروں کے پاس ناشتے کا سامان اور مٹی کے تیل کے سلنڈر اور چولہے تھے جن کے پھٹنے سے آگ لگی۔‘ انھوں نے بتایا کہ آگ پر قابو پا لیا گیا ہے اور تین بوگیاں متاثر ہوئی ہیں۔ ان کا کہنا تھا کہ ٹرین ٹریک سے ڈی ریل نہیں ہوئی تھی اور کئی مسافروں نے بوگیوں میں آگ لگنے کی وجہ سے چھلانگ لگا دی تھی۔ شیخ رشید نے بتایا کہ سروس کی معطلی کے بعد پاکستان ریلوے کی 134 ٹرینز اور ان کے اپ سٹریم اور ڈاؤن سٹریم ٹریکس کو بحال کردیا گیا ہے۔
نجی چینل سے بات کرتے ہوئے شیخ رشید کا کہنا تھا کہ ایک ہی نام سے متعدد بوگیوں کی بکنگ ہوئی تھی۔ ان میں سے دو بوگیاں اکانومی جبکہ ایک بزنس کلاس کی تھی۔ حکام کی جانب سے تاحال ہلاک ہونے والوں کی شناخت کی کوشش ہورہی ہے۔ ریڈیو پاکستان کے مطابق واقعے کا نوٹس لیتے ہوئے وزیر اعظم عمران خان نے غم کا اظہار کیا اور متاثرین کو بہترین طبی امداد دینے کے احکامات جاری کیے ہیں۔
شیخ رشید نے بتایا ہے کہ مسافروں اور ٹرین کی انشورینس ہے جس سے مالی نقصان کی تلافی ہوسکے گی۔ انھوں نے واضح کیا کہ واقعے کی مزید تحقیقات ہو رہی ہیں۔
( بشکریہ : بی بی سی اردو )