بنگلہ دیش سیمی فائنل ہار گیا : فائنل میں اتوار کو پاکستان اور بھارت مد مقابل

ایجبسٹن : بھارت نے بنگلہ دیش کو چیمپیئنز ٹرافی کے دوسرے سیمی فائنل میں باآسانی نو وکٹ سے شکست دے کر فائنل کیلئے کوالیفائی کر لیا اتوار کواس کا مقابلہ پاکستان سے ہو گا۔ ایجبسٹن میں کھیلے جا رہے میچ میں بھارت کے کپتان ویرات کوہلی نے ٹاس جیت کر پہلے فیلڈنگ کا فیصلہ کیا۔ بنگلہ دیش کی اننگز کا آغاز اچھا نہ تھا اور ایک کے اسکور پر سومیا سرکار بغیر کوئی رن بنائے پویلین لوٹ گئے جبکہ صابر رحمان بھی 31 کے مجموعی پر پویلین لوٹ گئے۔ تاہم اس کے بعد مشفیق الرحیم اور تمیم اقبال نے عمدہ بیٹںگ کا مظاہرہ کیا اور 123 رنز کی شراکت قائم کر کے اپنی ٹیم کو مضبوط پوزیشن میں پہنچا دیا۔ 154 کے مجموعی اسکور پر تمیم اقبال 70 رنز بنانے کے بعد پویلین لوٹ گئے لیکن بنگلہ دیش کو اصل دھچکا اس وقت لگا جب تجربہ کار شکیب الحسن اور مشفیق الرحیم یکے بعد دیگرے پویلین لوٹ گئے۔ 179 رنز پر پانچ وکٹیں لینے کے بعد ہندوستانی ٹیم نے بہترین انداز میں میچ میں واپسی کی اور بنگلہ دیشی ٹیم اس کے بعد کھل کر بیٹنگ نہ کر سکی ۔ جسپریت براہ نے محموداللہ اور مصدق حسین کو پویلین چلتا کیا تو بڑے اسکور کی امیدیں دم توڑ گئیں لیکن اختتامی اوورز میں مشرفی مرتضیٰ نے چند بڑے شاٹس لگا کر اپنی ٹیم کو 264 کے مجموعے تک رسائی دلائی۔ بھارت کی جانب سے جسپریت بمراہ، بھونیشور کمار اور کیدر جادھو نے دو دو وکٹیں حاصل کیں۔ ہدف کے تعاقب میں بھارتی اوپنرز نے اپنی ٹیم کو 87 رنزکا عمدہ آغاز فراہم کر کے ہدف تک رسائی مزید آسان بنا دی۔ شیکھر دھاون 46 رنز بنانے کے بعد آؤٹ ہوئے۔ لیکن پہلی وکٹ گرنے کے بعد بنگلہ دیش کیلئے وکٹ کا حصول ناممکن بن گیا اور کپتان ویرات کوہلی نے روہت شرما کے ساتھ مل کر ناقابل شکست 178 رنز کی شراکت قائم کی اور اپنی ٹیم کو نو وکٹ کی فتح سے ہمکنار کرانے کے ساتھ ساتھ فائنل کیلئے بھی کوالیفائی کرا دیا۔ بھارت کی جانب سے ویرات کوہلی نے 96 اور روہت شرما نے 123 رنز کی اننگز کھیلی۔