کورونا وائرس نے قیوم خان خوگانی کی جان بھی لے لی

ملتان : ڈپٹی ڈائریکٹرجنرل انٹیلی جنس بیورو لاہوراوردبئی میں پاکستانی قونصل خانے کے سابق قونصلرقیوم خان خوگانی جو گزشتہ دوہفتوں سے کورونا وائرس کے نتیجے میں طیب اردوان ہسپتال مظفرگڑھ میں زیرعلا ج تھے ، جمعرات کی سہ پہر جان کی بازی ہارگئے۔ ان کی عمر56برس تھی۔قیوم خان خوگانی کا تعلق ملتان سے تھا۔
انہوں نے سول لائنز کالج ملتان ،ایمرسن کالج اور زکریایونیورسٹی ملتان سے تعلیم حاصل کی۔زمانہ طالب علمی میں وہ پیپلزسٹوڈنٹس فیڈریش (پی ایس ایف)کے سرگرم رکن تھے۔ سابق وزیراعظم بے نظیر بھٹو کے دورحکومت میں انہیں انٹیلی جنس بیورو میں بھرتی کیاگیا۔
انہوں نے اپنے محکمے میں ایک فرض شناس اور مستعد افسر کی حیثیت سے شہرت حاصل کی اور بہت جلد ترقی کی منازل طے کیں۔ وہ کئی سال تک دبئی میں بطور قونصلرفرائض انجام دیتے رہے۔کچھ عرصہ قبل انہوں نے بہاولپور اورملتان میں بھی خدمات انجام دیں۔ وہ مارچ 2020 سے لاہور میں تعینات ہوئے تھے۔ گزشتہ ماہ وہ لاہور میں کورونا وائرس کاشکارہوئے اور علاج کے لیے چھٹی لے کر ملتان آگئے۔ ملتان میں ان کی طبعیت سنبھل گئی اور انہوں نے مختلف دوستوں سے بھی ملاقاتیں کیں۔ تاہم دو ہفتے قبل حالت بگڑنے کے بعد انہیں طیب اردوان ہسپتال مظفرگڑھ منتقل کردیاگیا جہاں گزشتہ ہفتے وہ وینٹی لیٹر پر منتقل کردیئے گئے۔
دو روز قبل ان کی حالت بہتر ہوئی اور انہیں وینٹی لیٹر سے اتارا گیا لیکن اس کے بعد ایک بارپھر بیماری کے شدید حملے کے نتیجے میں وہ جان کی بازی ہارگئے۔ان کے پسماندگان میں بیوہ ، ایک بیٹا اور دوبیٹیاں شامل ہیں۔ان کی نماز جنازہ جمعرات کو ساڑھے نوبجے شب شاہی عید گاہ خانیوال روڈ ملتان میں ہی ادا کی جائے گی۔