نشتر ہسپتال سے لاکھوں روپے مالیت کا سامان چوری : چار ملزمان گرفتار ، تحقیقات جاری

ملتان(عدنان فاروق قریشی سے)نشتر ہسپتال سے لاکھوں روپے مالیت کی سولر پلیٹیں، بجلی کے تار اور میڈیسن چوری ہونے کا انکشاف ہوا ہے ، چوری کرنیوالے ہسپتال ملازم نکلے،پولیس نے ملزمان کو گرفتار کر کے کارروائی شروع کردی ہے۔باوثوق ذرائع سے معلوم ہوا ہے کہ نشتر ہسپتال ملتان سے لاکھوں روپے مالیت کی سولر پلیٹیں،بجلی کی تاریں،میڈیسن اور دیگر قیمتی سامان کی مسلسل چوری کی شکایتیں موصول ہورہی تھیں۔چند روز قبل بھی نشتر ہسپتال سے مذکورہ سامان چوری کرتے ہوئے نشتر انتظامیہ نے ایک نشہ کے عادی شخص کو پکڑ کر پوچھ گچھ کی تو معلوم ہوا کہ چوری کی وارداتوں میں نشتر ہسپتال کا ہی اسرار نامی ملازم شامل ہے۔واقعہ کی اطلاع تھانہ کینٹ پولیس کو دی گئی جس پر کینٹ پولیس نے نشتر ہسپتال کے ملازم اسرار کو تین ساتھیوں سمیت گرفتار کر لیا ہے۔ذرائع نے بتایا ہے کہ اسرار اور اس کے ساتھیوں نے دوران تفتیش لاکھوں روپے مالیت کا قیمتی سامان چوری کرنے کا انکشاف کیا ہے اور اس نے دوران تفتیش یہ بھی انکشاف کیا ہے کہ وہ عرصہ دراز سے ہسپتال سے قیمتی سامان چوری کرنے میں مصروف ہے۔پولیس نے ملزمان کے خلاف مقدمہ درج کیا۔ہے اور چوری شدہ مال برآمد کرنے میں مصروف ہے۔جبکہ ذرائع نے یہ انکشاف کیا ہے کہ ملزم اسرار کا تعلق نشتر ہسپتال کی بااثر یونین سے ہے اور یونین کے بعض عہدیدار مبینہ طور پر اس کی سرپرستی بھی کرتے ہیں اور اپنا حصہ وصول کرتے ہیں جسکی وجہ سے وہ معاملہ کو رفع دفع کرنے کےلیے نشتر انتظامیہ پر دباؤ ڈال رہے ہیں۔جبکہ دوسری جانب ایم ایس نشتر ہسپتال ڈاکٹر راؤ امجد نے بتایا کہ وہ کسی کی دھمکیوں میں آنیوالے نہیں ہیں انہی کی ٹیم نے دن رات محنت کرکے چوروں کو پکڑ کر پولیس کے حوالے کیا ہے اور نشتر انتظامیہ چوروں کے خلاف بھرپور مقدمہ لڑے گی اور نشتر سے چوری ہوئی ایک ایک پائی واپس حاصل کریگی۔