کرونا کا ایک اور وار : معروف شاعر اور ماہرتعلیم فہیم اصغر ہم میں نہیں رہے

ملتان: معروف شاعر اور ماہر تعلیم فہیم اصغر گزشتہ شب ملتان میں انتقال کرگئے ان کی عمر 55 برس تھی اور وہ گزشتہ کئی روز سے کرونا کا شکار تھے۔
فہیم اصغر کا شمار ان شعرا میں ہوتا تھا جنہوں نے 1980 کے عشرے میں ہائیکو کے ذریعے اپنے شعری سفر کا آغاز کیا وہ غزل اور نظم بھی کہتے تھے لیکن بعد ازاں انہوں خود کو شعبہ تعلیم کے ساتھ وابستہ کرلیا ۔ فہیم اصغر کا تعلق حزیں صدیقی کی بیٹھک سے رہا وہ اس بیٹھک کے باقاعدہ اراکین میں شامل تھے ۔ فہیم اصغر کی مطبوعہ کتب میں ہائیکو کا مجموعہ خواب و خیال، اور مضامین کے مجموعے گزشتہ را صلوٰۃ اور عہد اقبال منظر و پس منظر شامل ہیں انہوں نے ادراک کے نام سے ایک ادبی جریدہ بھی شائع کیا تھا ۔ ان کے پسماندگان میں بیوہ کے علاوہ ایک بیٹا اور ایک بیٹی شامل ہیں ۔فہیم اصغر کو بدھ کی صبح سپرد خاک کر دیا گیا ۔