پی ٹی آئی سےلیگی ایم این اے کے چند سوالات۔۔۔۔ ایم ایم ادیب

کسی بھی کالم پرردعمل کا آنا معمول کی بات ہے مگر بعض دفعہ ردعمل اتنا تلخ ہوتا ہے کہ اس کی کڑواہٹ روح تلک سرایت کر جاتی ہے ،کھرا سچ لکھنا مگر عادت رہی ہے اثر کچھ نہیں ہوتا مگر دل کا بوجھ اتر جاتا ہے ۔
بہاولنگر این اے 169سے مسلم لیگ ن کے ممبراسمبلی چوہدری نورالحسن تنویر( جنہوں نے اعجازالحق کو بہت بڑی لیڈ سے
شکست دی)اپنے قائد نواز شریف جتنے محب وطن ہیں ،اس سے بڑھ کر یہ کہ انسان دوست ہیں ،میرے گزشتہ کالم میں انہیں عمران حکومت کے طرفدار ہونے اور اس کی غلطیوں پر پردہ ڈالنے کی خوشبو نہ جانے کیسے اور اور کیوں محسوس ہوگئی کہ ایک طویل وائس میسج کے ساتھ ایک سوالنامہ بھی تحریراََ بھیجا ہے ۔اب ان کے سوالنامے کو اظہاریئے کا حصہ نہ بنانا صحافتی بد دیانتی ہوگی ،اس استفسار کے ساتھ کہ انہوں نے یہ سوالات کس مصلحت کے تحت اسمبلی فورم پر نہیں اٹھائے؟
واضح رہے کہ موصوف نے یہ سوالات عمران خان سے نہیں بلکہ پی ٹی آئی کے پڑھے لکھے کارکنوں سے ان کے جوابات مانگے ہیں ۔سوالات من وعن شامل کالم کئے جارہے ہیں۔
1۔عمران نے 350ڈیمز کا وعدہ کیا تھا ،مجھے کوئی پی ٹی آئی والا دوست بتائے ڈیم کہاں ہیں ؟
2۔کے پی کے میں 70یونیوورسٹیز کا وعدہ کیا تھا PTIحکومت نے صوبے میں پانچ سال میں کتنی یونیورسٹیز بنائیں؟
3۔کے پی کے میں پی ٹی آئی حکومت نے کتنے کالج بنائے ،کالجز اور ان کی جگہ بتائیں؟
4۔کے پی کے میں کوئی ایک نیا ہسپتال بنایا ہو تو جگہ اور نام بتائیں ؟
5۔کے پی کے میں پانچ سالہ حکومت کے دوران 16گرلز کالج بند کیوں کئے گئے؟
6۔کے پی کے میں 355پرائمری اور مڈل سکول یہ کہہ کر ختم کیا گیا کہ خزانے پر بوجھ ہیں ؟
7۔پشاور میٹرو بس آٹھ ارب میں بننے والی تھی 97ارب تک پہنچ گئی 6اسٹیشن مکمل ہونے کے بعد پتا چلا کہ بس اسٹیشن کے اندر جاہی نہیں سکتی ،تو کوشش کی گئی کہ اب بس کو اڑاکر اسٹیشن کے اوپر سے گزارا جائے جو ممکن نہیں ہوا تو تمام اسٹیشن گرائے گئے اور اب نئی لاگت 122.35ارب ہوگئی ہے ۔ایسا کہیں اور ہوا ہے؟
8۔ملتان میٹرو بقول عمران خان 64ارب میں بنی اب عمرانی حکومت نے اس کی شفافیت کی رپورٹ دیتے ہوئے کہا
”میٹرو میں کرپشن نہیں ہوئی 27ارب کی بنی ،اس جھوٹ کا دفاع کیسے کرینگے؟
9۔پی ٹی آئی رہنما نذر گوندل پر سرکاری خزانے سے 82ارب کی کرپشن کا کیس تھا اسے کس میرٹ کے تحت پارٹی میں
لیا گیا اور کیس کا کیا بنا؟
10۔بابر اعوان کی نندی پور پروجیکٹ میں 284ارب کی کرپشن کا کیا بنا ؟
11۔علیمہ خان کے پاس 140 ارب کہاں سے آئے؟
12۔عمران خان کا کے پی کے کے ہیلی کاپٹر کے بے جا استعمال کے کیس کا کیا بنا؟
13۔مالم جبہ کیس میں وزیر اعلیٰ کے پی کے کی 34ارب کی کرپشن کا کیا ہوا؟
14۔پرویز خٹک اور اس کے بھائی کی 46ارب کی کرپشن کی داستان کا کیا اختتام ہوا؟
15۔کے پی کے میں پچھلے پانچ سال پی ٹی آئی کی حکومت رہی ،اس کا خزانہ کیسے خالی ہوگیا ؟
16۔خیبر بنک کے ڈوبنے کا ذمہ دار کون ہے اس کی انکوائری کیوں بند کی گئی؟
17۔کے پی کے نیب کی اصلاحات پر 80کروڑقوم کے خرچ کئے گئے منصوبہ بند کیوں کر دیا گیا؟
18۔کے پی کے نیب کو تالے کیوں لگائے گئے؟
19۔سپیکر قومی اسمبلی اسد قیصر کا اسلام آباد والا بنگلہ 35کروڑ کا۔کدھر سے آیااور اس پر انکوائری دوسال میں کہا ں تک
پہنچی؟
20۔پہلی حکومتوں سے ڈالر بڑھنے سے نقصان تھااب فائدہ کیسے ہے؟
21۔عمران خان نے الیکشن کمیشن میں اپنے اثاثے دو ارب چونتیس کروڑ نقد اور تین سو بائیس کنال بنی گالہ ہاﺅس اور لگژری گرینڈ حیات ہوٹل اسلام آباد میں اپنے 28فلیٹ شو کئے اور ٹیکس ایک لاکھ پانچ ہزار کیوں دیا؟
22۔پہلے تھر کے کوئلے سے آلودگی پھیلتی تھی ،اب وہ تھر کا کوئلہ تقدیر کیسے بدلے گا ؟(کپتان کے بقول)
23۔سابقہ حکومتوں میں قرضہ اگر بھیک تھاتو آپ کا پیکیج کیسے بن گیا؟
24۔اگر عمران حکومت سابقہ حکومتوں کا قرضہ واپس کرنے کے لئے قرض لے رہی ہے تو پھر قرضے میں کمی کیوں نہیں ہورہی بڑھ کیوں رہا ہے؟
25۔عمران حکومت اس بار سالانہ ٹیکس جمع کرنے میں ناکام کیوں ہوئیَ؟
26۔جی ڈی پی میں کمی کیوں آئی؟
27۔پی آئی اے اور اسٹیل ملز کی نجکاری کیوں کی جا رہی ہے جبکہ کچھ دن پہلے وزیر خزانہ نے کہا تھا پی آئی اے کا خسارہ
کم ہوا ہے؟
28۔علیمہ خان نے ابھی تک FBFکی ڈیڈ لائن ختم ہونے کے باوجود جرمانہ کیوں نہیں بھرا؟
29۔عمران خان کی دوسری بہن کے پاس 60ارب کہاں سے آئے؟
30۔بقول عمران خان ملک میں بارہ ارب کرپشن تھی جسے روک لیا گیا ،تو پھر قرض کی کیوں ضرورت پڑی؟
31۔اسد عمر نے کہا ن لیگ نے ہمیں خزانے میں اٹھارہ ارب ڈالر دیئے ،عمران خان کہتے ہیں خزانہ خالی ہے ان میں جھوٹا کون ہے؟
ٰیہ وہ سوالات ہیں جو مسلم لیگ ن کے ایم این اے چوہدرری نورالحسن تنویر نے بھیجے ہیں ان کے علاوہ انہوں نے کرائے کے لکھنے والوں ،ٹی وی اینکرز اور پاک فوج پر جو سوالات اٹھائے ان کے بارے میں اتنا کہنا کافی ہے کہ اپنے گریبان میں بھی جھانک لیں ،آئینے کے سامنے کھڑے ہونے کی جرات ہو تو اپنے عکس پر نظر ڈال کر سچ سچ بتائیں آیئنہ کیا کہتا ہے؟