قم / اصفحان / تہران : اسرائیل کے ایران پر حملے جاری ہیں اور ہفتہ کے روز علی الصبح اس نے قم اور اصفحان کو نشانہ بنایا ۔۔ بی بی سی فارسی کے مطابق قم میں ایک رہائشی عمارت کو نشانہ بنایا گیا۔ ہمشہری اخبار نے لکھا ہے کہ قم میں ایک عمارت کی کئی منزلوں کو نشانہ بنایا گیا۔ قم کے صوبائی انتظامیہ کے ہیڈ کوارٹر کے ترجمان مرتضی حیدری نے حملے کی تصدیق کرتے ہوئے کہا کہ ’سلاریح محلے میں ایک عمارت کی چوتھی منزل کو نشانہ بنایا گیا۔‘ مقامی اہلکار کے مطابق دھماکے میں ایک 16 سالہ نوجوان ہلاک اور دو افراد زخمی ہوئے جنھیں طبی مراکز میں منتقل کر دیا گیا ہے۔
قم کے صوبائی کرائسز مینجمنٹ ہیڈ کوارٹر کے ترجمان مرتضی حیدری نے قم میں ایک رہائشی عمارت پر اسرائیلی حملے میں ہلاکتوں کی تعداد میں اضافے کا اعلان کیا ہے۔
دوسری جانب ایران کے شہر اصفہان شہر میں زوردار دھماکے کی آواز سنی گئی ہے۔ ایران کے سرکاری میڈیا پریس ٹی وی کے مطابق اسرائیل نے جنوبی شہر اصفہان پر حملہ کیا ہے۔
ہمشہری اخبار نے بھی اطلاع دی ہے کہ دھماکہ اس وقت ہوا جب فضائی دفاعی نظام فعال تھا۔ایرانی میڈیا کے مطابق تہران میں فضائی دفاعی نظام کو فعال کر دیا گیا ہے اور ’تہران کے مغرب اور مشرق میں متعدد دھماکوں کی آوازیں سنی گئی ہیں۔‘
فیس بک کمینٹ