ملتان : ( روف مان سے ) پاکستان ریلوے میں ملازمین کی چھانٹی کا عمل شروع ہو گیا ہے اور وزارت ریلوے نے ریشنلائزیشن کمیٹی کی سفارشات کی روشنی میں محکمہ کے 8شعبوں کی منظورشدہ 17ہزار371 اسامیوں میں سے 5ہزار494اسامیاں ختم کرنے کی باقاعدہ منظوری دے دی،جب کہ ریلوے کے شعبہ کمرشل وٹریفک،سول انجینئرنگ،میکنیکل انجینئرنگ اور دیگر شعبوں سے مزید ہزاروں اسامیاں ختم کرنے بارے ریشنلائزیشن کمیٹی کی سفارشات وزارت ریلوے کوپہلے ہی ارسال کی جاچکی ہیں ۔
وزارت ریلوے نے گزشتہ روز جن 8شعبوں سے 5494اسامیاں ختم کرنے کی باقاعدہ منظوری دے دی ہے ان میں ایڈمنسٹریٹو سٹاف(کلریکل) کی 1326اسامیاں،ویلفیئرسٹاف کی 15،انفارمیشن اینڈ ٹیکنالوجی ڈیپارٹمنٹ کی 85،شعبہ سٹورکی 400،میڈیکل ڈیپارٹمنٹ کی 853،آفس سپرنٹنڈنٹس کی 22،برج ورکشاپ جہلم کی 157 اورریلوے ورکشاپ ڈویژن کی سب سے زیادہ 2636اسامیاں ختم کردی گئی ہیں۔
مذکورہ اسامیاں ختم ہونے سے ریلوے کے مذکورہ شعبوں میں منظور شدہ اسامیوں کی تعداد اس طرح سے ہوگی،ایڈمنسٹریٹو سٹاف(کلریکل) کی اسامیوں کی تعداد 3393سے کم ہوکر2067،ویلفیئرسٹاف کی37سے کم ہوکر 22،انفارمیشن اینڈ ٹیکنالوجی ڈیپارٹمنٹ کی115 سے کم ہوکر 30،سٹور ڈیپارٹمنٹ کی 807سے کم ہوکر 407،میڈیکل ڈیپارٹمنٹ کی 1758سے کم ہوکر 905،آفس سپرنٹنڈنٹس کی71سے کم ہوکر 49،برج ورکشاپ جہلم کی 388سے کم ہوکر231،اورریلوے ورکشاپ ڈویژن کی 10ہزار802اسامیوں کی تعداد کم ہوکر 8166رہ جائے گی،مجموعی طور پر مذکورہ بالا شعبوں کی منظورشدہ 17ہزار371اسامیوں کی تعداد اب کم ہوکر صرف 11ہزار877رہ جائے گی،ریلوے ذرائع کے مطابق چھانٹی کا فیصلہ اربوں روپے خسارے سے دوچار پاکستان ریلوے کی مالی حالت بہتربنانے کے لیے کیا گیاہے،
فیس بک کمینٹ