کراچی : ریحام خان نے پاکستان ریپبلک پارٹی کے نام سے ایک سیاسی جماعت بنانے کا اعلان کیا ہے۔ کراچی پریس کلب میں پریس کانفرنس سے خطاب کے دوران ان کا کہنا تھا کہ نئی سیاسی جماعت عوام کی اواز بن کر حکمرانوں کا پیچھا کرے گی۔ انھوں نے کہا کہ پاکستان ریپبلک پارٹی عوامی مسائل کے حل کے لیے بھرپور جدو جہد کرے گی۔
سابق وزیرِ اعظم عمران خان کی سابقہ اہلیہ کا کہنا تھا، ’ملک میں ایسے وزیراعظم بھی آئے جنھیں خبروں کا بیوی یا ٹی وی سے پتا چلتا تھا۔‘ کراچی پریس کلب میں پریس کانفرنس کرتے ہوئے ریحام خان نےکہا کہ پاکستانیوں کو جینے نہیں دیا جا رہا، وہ آج سے ایک ایسی تحریک شروع کرنے جا رہی ہیں جو ایوان میں عوامی نمائندگی کرےگی، کراچی سے باقاعدہ تحریک کا آغاز کر رہی ہوں۔ نئی پارٹی کا اعلان کرتے ہوئے ریحام خان نےکہا کہ ہم قوانین میں ایسی تبدیلیاں لائیں گےکہ عوام کو فائدہ ہوگا، خواتین اورکسانوں کی نمائندگی بھی ہونی چاہیے۔ انہوں نےکہا کہ پورا پاکستان ان کا حلقہ ہے ،عوامی مسائل کے حل کے لیے بھر پور جدوجہد کریں گے۔
انہوں نے حکومت پر تنقید کرتے ہوئےکہا کہ تاجروں نے شٹرڈاؤن ہڑتال کا اعلان کیا تو وزیر خزانہ تاجروں کو اسلام آباد بلالیتے ہیں، پہلے مشاورت کیوں نہیں کی جاتی؟ ریحام خان کا کہنا تھا کہ میں نے زندگی میں ہمیشہ سیاسی جماعتوں سے دوری رکھی، جوکام کیا وہ میرٹ کی بنیاد پرکیا اور لوگوں سے یہی امید رکھتی ہوں۔ ریحام خان نے اپنی سیاسی جماعت کا لوگو بھی جاری کردیا ہے۔
( بشکریہ : جیو نیوز )
فیس بک کمینٹ