لاہور : پاکستان کی معروف و سینئر غزل گو کلاسیکل گلوکارہ ترنم ناز نے کہا ہےکہ اس بات کا غم ساری زندگی رہے گا کہ میں نے محنت کے پیسوں سے کمایا اور اپنا گھر بچوں کے نام کردیا۔
حال ہی میں لیجنڈری کلاسیکل گلوکارہ ترنم ناز نے ایک شو میں شرکت کی جس میں میزبان نے ان سے سوال کیا کہ ان کی زندگی کا غمگین ترین لمحہ کون سا تھا؟
جواب میں ترنم ناز نے بتایا کہ میں نے اپنی محنت کی کمائی سے زمین لی اور پھر اپنی پسند کے مطابق بہت دل سے اپنا گھر بنایا تھا، بچے اُس وقت چھوٹے تھے تو میں نے یہ گھر ان کے نام کردیا کہ چاہے میرے نام ہو یا بچوں کے، ایک ہی بات ہے۔
ترنم ناز نے دکھ بھرے انداز میں بتایا کہ جب بچے بڑے ہوگئے اور ان کی شادی کرائی تو وہ گھر میں سے حصہ مانگنے لگے، والدین کی حیثیت اور اہمیت تب مختلف ہوتی ہے جب وہ خود اپنی پراپرٹی کے مالک ہوں۔
گلوکارہ ترنم ناز نے تسلیم کیا کہ اپنا گھر بچوں کے نام کردینا میری زندگی کی سب سے بڑی غلطی تھی جس کا رنج تاحیات رہے گا، بچے اب بھی تابعدار ہیں لیکن اگر گھر میرے ہی نام رہتا تو صورت حال مزید بہتر اور مختلف ہوتی۔
خیال رہے کہ ترنم ناز کو پاورفل آواز اور کلاسیکل پی ٹی وی گانوں کے لیے یاد کیا جاتا ہے، وہ استاد عاشق حسین کی شاگردہ رہ چکی ہیں اور میڈم نور جہاں سے کافی مماثلت بھی رکھتی ہیں، انہیں پرائڈ آف پرفارمنس سے بھی نوازا جا چکا ہے۔
( بشکریہ : جیو نیوز )
فیس بک کمینٹ