اسلام آباد: وزیر اعظم شہبازشریف نے آج 28 مئی یوم تکبیر پر عام تعطیل کا اعلان کردیا۔
وزیراعظم آفس سے جاری بیان کے مطابق وزیر اعظم شہباز شریف نے پاکستان کے دفاع کو ناقابل تسخیر بنانے کے دن، 28 مئی یوم تکبیر کو سرکاری چھٹی قرار دیا ہے۔
کابینہ ڈویژن نےعام تعطیل کانوٹیفکیشن جاری کردیا ہے جس کے مطابق 28 مئی یوم تکبیر پر ملک بھر میں عام تعطیل ہوگی، ملک بھرکے تمام سرکاری اور نجی ادارے بند رہیں گے۔
وزیراعظم کا کہنا ہےکہ یوم تکبیر پاکستانی قوم کے ملک کے دفاع کو ناقابل تسخیر بنانے کے لیے اتحاد کی یاد دلاتا ہے، آج کے دن پوری قوم نے اس ملک کی سالمیت کے لیے یہ فیصلہ کیا کہ ملکی دفاع پر کسی قسم کا بیرونی دباؤ قبول کرکے سمجھوتہ نہیں کیا جائے گا۔
وزیراعظم کے مطابق یوم تکبیر سیاسی اور دفاعی قوتوں کے اس ملک کے دفاع کو مضبوط تر بنانے کے لیے ایک جھنڈے، سبز ہلالی پرچم تلے متحد ہونے کی یاد دلاتا ہے، یوم تکبیر بیرونی دشمنوں کے ساتھ ساتھ ایسے اندرونی دشمنوں، جو ملک میں انتشار کی سیاست سے اس ملک کو خطرے سے دوچار کرنا چاہتے ہیں، ان کے ناپاک عزائم کو ہمیشہ ناکام بنانے کے عہد کی تجدید کا دن ہے۔
وزیراعظم کا کہنا ہے کہ 28 مئی یوم تکبیر اس وقت کے وزیراعظم نواز شریف اور پاک فوج کے پاکستان کے دفاع کو ناقابل تسخیر بنانےکے اقدام کو خراج تحسین پیش کرنےکا دن ہے، اس دن ہم ذوالفقار علی بھٹو کے پاکستان کے ایٹمی پروگرام شروع کرنے اور اسے جاری و ساری رکھنے میں اہم کردار ادا کرنے والے سائنسدانوں کو بھی خراج تحسین پیش کرتے ہیں۔
ان کا کہنا ہےکہ مجھ سمیت پوری پاکستانی قوم اس دن یہ عہد کرتی ہے کہ 28 مئی کو جس طرح اس ملک کے دفاع کو ناقابلِ تسخیر بنایا، ویسے ہی ہم شبانہ روز محنت سے اس ملک کی اقتصادی سلامتی کو یقینی بنائیں گے۔
انہوں نے مزید کہا کہ آئیں، آج کے روز ہم یہ عہد کریں کہ نا صرف بیرونی دشمنوں، بلکہ پاکستان میں موجود 9 مئی جیسے واقعات سے انتشار کے خواہشمند عناصر کی شرپسندی کو اتحاد، تنظیم اور یقینِ محکم کے ساتھ ساتھ دن رات محنت سے ناکام بنائیں گے۔
چاروں صوبوں اور آزادکشمیر میں بھی عام تعطیل کا اعلان
وفاق کے ساتھ خیبر پختونخوا، پنجاب، سندھ اور بلوچستان حکومت سمیت آزاد کشمیر نے بھی آج عام تعطیل کا اعلان کیا ہے۔
سپریم کورٹ، لاہور ہائی کورٹ، سندھ ہائی کورٹ اور ملک بھر میں ماتحت عدالتیں بھی بند رہیں گی۔
یوم تکبیر کے سلسلے میں آج سرکاری تعطیل کے باعث اسٹیٹ بینک بند اور پاکستان اسٹاک ایکسچینج بند رہےگی۔
ملک کی مختلف جامعات میں بھی چھٹی کا اعلان
28 مئی کو عام تعطیل کے اعلان کےبعد ملک کی مختلف جامعات میں بھی چھٹی کا اعلان کیا گیا ہے۔
کراچی یونیورسٹی نے عام تعطیل کا اعلان کرتے ہوئے منگل کو ہونے والے امتحانات ملتوی کردیے۔ وفاقی تعلیمی بورڈ کے زیر اہتمام آج ہونے والے امتحانات اور پریکٹیکل بھی ملتوی کردیےگئے۔
عام تعطیل کے باعث کراچی میں میٹرک بورڈ کے تحت ہونےوالےامتحانات نہیں ہوں گے، نئی تاریخ کا اعلان بعد میں کیا جائےگا۔
یوم تکبیرپر آزاد کشمیر میں بھی عام تعطیل ہوگی، تاہم انٹر اور ثانوی بورڈ کے امتحانات شیڈول کےمطابق ہوں گے۔
دوسری جانب ترجمان کیمبرج بورڈ کے مطابق او اور اے لیول کے امتحانات آج شیڈول کے مطابق ہوں گے۔
(بشکریہ:جیونیوز)
فیس بک کمینٹ