پاکستان کرکٹ ٹیم کے سابق کپتان، سابق چیف سلیکٹر انضمام الحق نے کہا ہے کہ پاکستان کرکٹ کی ناکامی کی بنیادی وجہ کوچ اور کپتان کا ایک پیج پر نہ ہونا ہے. جس وقت یہ اختلاف ختم کردیں گے تو ٹیم درست ہوجائے گی اور دوسری اہم بات یہ کہ پلیئرز پر ہر حال میں اعتماد قومی ٹیم کو ناقابل شکست بنادے گا. ہیڈ کوچ، بیٹنگ کوچ اور چیف سلیکٹر الگ الگ عہدے ہیں. ایک ہی بندے نے اگر یہ سارے کام کرنے ہیں تو باقی 2 عہدے (چیئرمین اور کپتان)بھی اسے بنادیں. کیریئر میں ایک سینئر کی ڈانٹ پر باتھ روم میں شاور میں جاکر آدھا گھنٹہ آنسو بہاتا رہا. صبر کیا اور جو پھل ملا کمال کا تھا.
انضمام نے سنسنی خیز انکشاف کیا کہ جس وقت میں چیف سلیکٹر تھا تو کپتان اور کوچ ایک پیج پر نہیں تھے.
مکی آرتھر کی سلیکشن کچھ اور کپتان کی کچھ اور ہوتی تھی. میرے لئے بھی مسائل تھے اور ٹیم کے لئے بھی مشکلات. اب اگر ایسا ہورہا ہے تو فتح مشکل ہوگی. مصباح کو ایک ساتھ سارے عہدے نہیں رکھنے چاہئیں. انصاف نہیں کرسکیں گے. بابر اعظم جیسا باصلاحیت بیٹسمین بڑے عرصے بعد آیا .موسی، نسیم شاہ اور عاکف اچھے پیسر کے طور پر سامنے آئے. فاسٹ بائولرز ہمیشہ آتے رہے ہیں. آل رائونڈر کی کمی ہے. بیٹسمین ٹیم کے لئے 40 رنز بھی کرلیں تو پاکستان جیتے گا.ہمارے دور میں کھیلنے والے بھارتی بلے بازوں کی طرح اپنی ذات کے لئے سنچری بنانے کا کوئی فائدہ نہیں ہوگا.
ورلڈ کپ 1992 عمران خان کے مجھ پر اور خود پر یقین کی کہانی ہے. 2 درجن سے زائد اننگز کی ناکامی کے باوجود جب وہ کہتے تھے کہ انضمام ورلڈ کپ جتوائے گا تو سینئر مجھے دیکھتے اور میں کپتان کو دیکھتا تھا .عمران نے یہ باتیں اتنی مرتبہ کیں کہ سینئرز مجھے زہر آلود نگاہوں سے دیکھنے لگے ان کا خیال تھا کہ میں نے عمران پر جادو کردیا ہے. کپتان کا یہ اعتماد ہی مجھے بڑا پلیئر بناگیا. ایک اننگ کی ناکامی پر مجھے ایک سینئر نے اتنا برا بھلا کہا کہ میں 30 منٹ شاور میں روتا رہا لیکن کپتان عمران خان نے ہر وقت حوصلہ افزائی کی .ایسی کپتانی میں نے نہیں دیکھی.
مشتاق احمد کے ساتھ خاصے دلچسپ واقعات رہے. کھیل میں ہلکی پھلکی تفریح پریشر دور کردیتی ہے.
پاکستان کرکٹ آج کے دور کی اور ہے. تینوں فارمیٹ کے الگ کھلاڑی بنانے کا فائدہ ہوگا.
( بشکریہ : کرک سین )
فیس بک کمینٹ