ملتان :نشتر ہسپتال کے سامنے تین نقاب پوش ڈاکوؤں کی اسلحہ کے زور پر ڈکیتی کی دلیرانہ واردات،لاکھوں روپے نقدی، موبائل فون لوٹ کر فرار، مزاحمت کرنے پر تاجر کو گولی مار کر زخمی کردیا،تشویشناک حالت میں نشتر ہسپتال داخل کروادیا گیا، چہلیک پولیس نے ایس ایچ او عمران گل نیازی کی سربراہی میں موقع پر پہنچ کرسی سی ٹی وی فوٹیج حاصل کرکے کاغذی کاروائیاں شروع کر دی ہیں ۔
چہلیک پولیس کے علاقہ نشتر ہسپتال کے بالکل سامنے واقع مہران پلازہ میں گزشتہ شب تقریباً 10بجے کے قریب تین نقاب پوش ڈاکو 222 رائفل لیکر داخل ہوئے جہاں پر اسوقت ادویات لینے والے درجنوں شہری بھی موجود تھے۔ڈاکووں نے پلازے کو دونوں اطراف سے گھیرے میں لے لیا تاکہ کوئی شہری یا تاجر پلازے سے باہر نہ جاسکے۔
ڈاکوؤں نے اسلحہ کے زور پر اسلام میڈیکل ہال، شفیع میڈیکل ہال اور ثمر میڈیکل ہال کے مالکان، عملہ اور وہاں پر موجود شہریوں کو یرغمال بنا لیا اور دیدہ دلیری سے لاکھوں روپے کی نقدی اور موبائل فون چھین لیے اور مزاحمت کرنے پر ثمر میڈیکل ہال کے ملازم کو گولی ماری کر فرار ہوگئے۔زخمی تاجر عبداللہ کو تشویشناک حالت میں نشتر ہسپتال کی ایمرجنسی وارڈ میں داخل کروادیا گیا ہے جہاں ڈاکٹر ا س کی جان بچانے کی کوششوں میں مصروف بتائے جاتے ہیں۔
فیس بک کمینٹ