کراچی / لاہور / اسلام آباد / پشاور / کوئٹہ( نمائندگان نیوز ایجنسیز) ملک بھر میں گزشتہ روز 8فروری 2024ء کو ہونے والے عام انتخابات کے نتائج رات گئے تک جاری نہ ہوسکے ، غیر معمولی تاخیر سے ملک بھر میں کنفیوژن پھیل گیا ، تاہم مختلف جماعتوں نے کامیابی کے دعوے کردیئے ۔
چیف الیکشن کمشنر نے رات 2بجے ریٹرننگ افسران کو آدھے گھنٹے میں نتائج بھجوانے کا حکم دیا تاہم وہ حکم بے اثر رہا اور نتائج صبح تک جاری نہ ہوسکے، چیف الیکشن کمشنر نے تاخیر کے ذمہ داروں کیخلاف کارروائی کا انتباہ دیتے ہوئے مختلف چینلز پر نشر رزلٹ غلط قراردیدیئے ۔ ادھر غیر سرکاری اور غیر حتمی نتائج کے مطابق سندھ میں پیپلز پارٹی اور خیبرپختونخوا میں آزاد امیدواروں کی بڑی تعداد کو برتری حاصل ہے تاہم پنجاب میں صورتحال غیر واضح ہے، بلوچستان میں نیشنل پارٹی اور آزاد امیدواروں کو برتری حاصل ہے ۔ آصف علی زرداری نوابشاہ ، بلاول بھٹو زرداری شہداد کوٹ سے اپنی نشستیں جیت گئے، شہباز شریف، مریم نواز، اختر مینگل، احسن اقبال،بیرسٹر گوہر ووٹوں کی گنتی میں آگے ہیں۔ مولانا فضل الرحمٰن ڈی آئی خان میں علی امین گنڈاپور سے پیچھے ہیں ، فضل الرحمٰن پشین میں آگے ہیں ۔ مسلم لیگ ن کے رہنما احسن اقبال نے جیو سے گفتگو کرتے ہوئے کہا کہ سب جاگ کر نتائج کا انتظار کررہےہیں، جب تک نتائج 50؍ فیصد سے زیادہ نہ ہوجائیں، ٹرینڈ کا کچھ نہیں کہہ سکتےلیکن ہم جیت رہے ہیں ۔
نتائج میں غیر معمولی تاخیر پر بلاول بھٹو نے تشویش کا اظہار کیا تاہم بلاول بھٹو اور آصف علی زرداری نے انتخابی نتائج پر اظہار اطمینان کیا اور نتائج کو حوصلہ افزا قرار دیا۔ بلاول بھٹو نے کہا کہ وہ بھی اسلام آباد جائیں گے اور پیپلز پارٹی کی وفاقی حکومت کے قیام کیلئے پرعزم ہیں۔تحریک انصاف کے رہنما بیرسٹر گوہر نے کہا کہ ہمیں150سے زائد نشستوں پر برتری حاصل ہے، خیبر پختونخوا اور وفاق میں اگلی حکومت بنائیں گے۔ تفصیلات کے مطابق ملک بھر میں گزشتہ روز 8فروری 2024ء کو ہونے والے عام انتخابات کے نتائج رات گئے تک جاری نہ ہوسکے ، غیر معمولی تاخیر سے ملک بھر میں کنفیوژن پھیل گیا ، تاہم مختلف جماعتوں نے کامیابی کے دعوے کردیئے ، الیکشن کمیشن آف پاکستان نے 9؍ فروری کو رات پونے تین بجے پہلے حتمی نتیجے کا اعلان کیا ۔ جبکہ جیو الیکشن سیل نے 25 ہزارپولنگ اسٹیشنوں کاغیر حتمی غیر سرکاری رزلٹ جاری کئے۔ سیکرٹری الیکشن کمیشن نے پونے تین بجے رات پی کے 6 سوات فور اور پی کے 76 پشاور فائیو کا اعلان کیا انہوں نے حتمی سرکاری نتیجہ کا اعلان کرتے ہوئے کہاکہ سوات سےآزاد امیدوار فضل حکیم خان یوسفزئی پچیس ہزار سے زائد ووٹ لے کر کامیاب ہوئے ہیں اور پشاور سے سمیع اللہ خان برتری لے چکے ہیں اس موقع پر انہوںنے میڈیا کے سوالات کے جواب نہیںدیے انہوںنے بتایاکہ جیسے جیسے الیکشن کمیشن کو نتائج موصول ہونگے ایک ایک کر کے بتائے جائیں گے۔ انہوںنے کہاکہ الیکشن میںتاخیرکی وجہ انٹرنیٹ کی بندش تھی۔ اس سے قبل چیف الیکشن کمشنر سکندر سلطان راجہ نے رات گئے تمام صوبائی الیکشن کمشنروں اور ریٹرننگ افسروں کو حکم دیا کہ آئندہ نصف گھنٹے میں حتمی الیکشن رزلٹ کا اعلان کریں ورنہ انہیں معطل کر دیا جائیگا۔ الیکشن کمیشن آف پاکستان نے رات 2بجکر بارہ منٹ پر الیکٹرانک میڈیا چینلوں پر اعلان کیا کہ ٹی وی چینلوں پر دکھائے جانے والے الیکشن نتائج درست نہیں ہیں۔ الیکشن کمیشن آف پاکستان ملک بھر کے قومی اسمبلی کے ریٹرننگ افسروں کے بھجوائے گئے الیکشن نتائج مرتب کر رہا ہے۔ یہ نتائج مرتب ہوتے ہی الیکشن کمیشن آف پاکستان اپنے اعلامئے میں درست الیکشن نتائج کا اعلان کریگا۔
فیس بک کمینٹ