نام ور شاعر اور دانشور خالد معین کا ناول وفور شائع ہو گیا : یہ موت اور محبت کی کہانی ہے ۔۔ رضی الدین رضی

ملتان:گرد وپیش پبلی کیشنز کے زیر اہتمام نام ور شاعر ، ادیب اور صحافی خالد معین کا ناول وفور شائع ہو گیا ہے ۔ خالد معین کے اب تک پانچ شعری مجموعے اور پانچ نثرکی کتابیں شائع ہو چکی ہیں ۔ 216 صفحات پر مشتمل اس ناول کی قیمت 1000 روپے ہے ۔ اس کا سرورق نام ور خطاط راشد سیال نے بنایا ہے اور اس کے پرنٹر ناصر ظہیر ہیں ۔ ۔ معروف شاعر اور صحافی رضی الدین رضی نے ناول کے فلیپ میں لکھا ہے ۔۔۔۔
”برادرم خالد معین کا تعلق یوں تو کراچی سے ہے لیکن وہ پنجاب کے مختلف ادبی حلقوں کی طرح ملتان والوں کے دل کے بھی بہت قریب ہیں ۔ہماری اُن کے ساتھ دیرینہ رفاقت ہے ۔اُن کی شاعری کے تو ہم ہمیشہ سے معترف ہیں اُن کے ناول ” وفور “میں ادب کے ساتھ صحافت بھی جھلکتی ہے ۔یہ وبا کے دنوں کا ناول ہے ۔ایک ایسے زمانے کا ناول جب ہم سب کورونا کی زد پر تھے اور اپنے گھروں تک محدود ہوچکے تھے ۔ہمیں اس ناول میں رومان بھی دکھائی دیا ،موت بھی، وبا کے دنوں کا خوف بھی اور تنہائی بھی لیکن اس کے ساتھ ایک شاعر اور صحافی کا اسلوب اس ناول کو وہ تخلیقی حسن عطا کرتا ہے کہ اسے پڑھنے والا مکمل طور پر اس کے حصار میں آجاتا ہے ۔“