اسلام آباد : ایران کے صدر ڈاکٹر سید ابراہیم رئیسی آج سے پاکستان کا تین روزہ سرکاری دورہ کریں گے۔
دفترخارجہ کی ترجمان ممتاز زہرہ بلوچ نے ایک بیان میں کہا ہے کہ رواں سال فروری میں عام انتخابات کے بعد کسی بھی سربراہ مملکت کا پاکستان کا یہ پہلا دورہ ہو گا۔ایران کے صدر کے ہمراہ ان کی اہلیہ اور ایک اعلی سطح کا وفد بھی ہوگا جس میں وزیرخارجہ، کابینہ کے دوسرے ارکان، اعلی حکام اور ایک بڑا تجارتی وفد بھی شامل ہو گا۔
اس دورے میں ڈاکٹر ابراہیم رئیسی صدر آصف علی زرداری، وزیراعظم شہبازشریف، سینیٹ کے چیئرمین سید یوسف رضا گیلانی اور قومی اسمبلی کے سپیکر سردار ایاز صادق سے ملاقات کریں گے۔ وہ لاہور اور کراچی بھی جائیں گے اور صوبائی قیادت سے بھی ملاقات کریں گے۔ان ملاقاتوں کے ایجنڈے میں پاک ایران تعلقات کو مزیدمضبوط بنانا اورتجارت، روابط، توانائی، زراعت اور لوگوں کے درمیان روابط سمیت مختلف شعبوں میں تعاون کا فروغ شامل ہے۔
دونوں ملکوں کے رہنما دہشت گردی کے مشترکہ خطرے سے نمٹنے کے لیے علاقائی وعالمی صورتحال اور باہمی تعاون پر بھی تبادلہ خیال کریں گے۔
فیس بک کمینٹ