شیخوپورہ میں غیرملکی فوڈ چین کے ریسٹورنٹ پر گزشتہ شب مسلح افراد نے حملہ کیا اور کچن میں گھس کر کی گئی فائرنگ سے ایک شخص جاں بحق ہوگیا۔
پولیس کے مطابق لاہور بائی پاس چوک میں واقع بین الاقوامی فوڈچین کے ہوٹل میں گزشتہ رات 2 نامعلوم موٹرسائیکل سواروں نے فائرنگ کرکے ہوٹل ملازم آصف نواز کو قتل کر دیا تھا اور فائرنگ کرتے ہوئے فرار ہو گئے تھے۔
پولیس کا کہنا ہے کہ حملہ آوروں کی فائرنگ سے ہوٹل کے شیشے بھی ٹوٹ گئے تھے، مقتول آصف نواز کی عمر 45 سال تھی جو بستی خان کالونی کا رہائشی تھا۔
پولیس کے مطابق آصف نواز چھٹی پر ہونے کے باوجود رات کو یہاں پہنچا، وہ فوڈ چین کے دروازے پر کھڑا تھاکہ فائرنگ ہوگئی جس سے وہ زخمی ہو گیا، وہ فوڈ چین کے اندر کی طرف بھاگا مگر جاں بَر نہ ہوسکا۔
کراچی ڈیفنس میں بین الاقوامی فوڈ چین پر مشتعل افراد کا حملہ، توڑ پھوڑ کی
مقتول کی لاش کا پوسٹمارٹم کرکے ورثا کے حوالے کر دی گئی جسے نماز جنازہ کے بعد مقامی قبرستان میں سپردِ خاک کر دیا گیا۔
دوسری جانب تھانا ہاؤسنگ کالونی پولیس نے 2 نامعلوم ملزموں کے خلاف ایس ایچ او کی مدعیت میں مقدمہ درج کر لیا، مقدمے میں قتل اور ہوٹل پر حملے سمیت انسداد دہشت گردی ایکٹ کی دفعات شامل کی گئی ہیں۔
پنجاب فارنزک اور پولیس کرائم سین کی ٹیموں نے شواہد اکٹھے کرکے ملزموں کی تلاش شروع کر دی۔
ڈی پی او شیخوپورہ بلال ظفر نے جیو نیوز کو بتایا کہ فوڈ چین کے باہر مظاہرے کیے گئے جن میں اسے بند کرنے کا مطالبہ کیا گیا تھا، پولیس نے فوڈ چین میں قتل کے بعد 25 سے زائدمشتبہ افراد حراست میں لے لیے، ان میں سے زیادہ تر کا تعلق ایک مذہبی جماعت سے ہے، مظاہرے میں متحرک اور اشتعال دلانے والوں پر بھی نظر ہے۔
(بشکریہ:جیونیوز)
فیس بک کمینٹ