اسلام آباد : پاک فوج کے شعبہ تعلقات عامہ آئی ایس پی آر کے مطابق لیفٹیننٹ جنرل آصف غفور کو کور کمانڈر کوئٹہ تعینات کردیا گیا۔پاک فوج کی اعلیٰ قیادت نے کور کمانڈر کوئٹہ لیفٹیننٹ جنرل سرفراز علی کی شہادت کے بعد کمانڈر 12 کور کا کمان لیفٹیننٹ جنرل آصف غفور کو سونپنے کا فیصلہ کیا۔
واضح رہے کہ کور کمانڈر کوئٹہ لیفٹیننٹ جنرل سرفراز علی لسبیلہ میں سیلاب متاثرین کی ریلیف آپریشن کی نگرانی کے دوران ہیلی کاپٹر حادثے میں شہید ہوگئے تھے۔ انکی شہادت کے بعد کمانڈر 12 کور کا عہدہ خالی ہو گیا تھا۔لیفٹیننٹ جنرل آصف غفور ساڑھے 3 سال بطور ڈی جی آئی ایس پی آر فرائض انجام دے چکے ہیں۔ آصف غفور آئی جی کمیونیکیشن اینڈ انفارمیشن ٹیکنالوجی تھے 2020 میں تھری اسٹار جنرل کے عہدے پر ترقی پائی۔لیفٹیننٹ جنرل آصف غفور نے بطور میجر کارگل جنگ میں بھی حصہ لیا تھا جبکہ جنوری 2020 میں جی او سی او کاڑہ تعینات ہوئے تھے۔
دوسری جانب ہیلی کاپٹر حادثے میں شہید کور کمانڈر لیفٹیننٹ جنرل سرفراز علی، ميجر جنرل امجد حنيف اور بريگيڈيئر خالد کی نماز جنازہ کوئٹہ کے بعد راولپنڈی ميں ادا کر دی گئی۔ وزيراعظم شہباز شريف، آرمی چیف، چيئرمين سينيٹ، وفاقی وزراء، اعلیٰ عسکری اور سول حکام نے شرکت کی۔