کوئٹہ : کوئٹہ میں حالی روڈ پر پشین اسٹاپ کےقریب ایف سی ہیڈ کوارٹر پر خود کش حملے میں 5 افراد جاں بحق ہوگئے۔ جیونیوز کے مطابق پولیس نےحالی روڈ کے قریب دھماکے کی تصدیق کرتے ہوئے بتایا کہ دھماکے میں اب تک 7 افراد جاں بحق اور 24 زخمی ہوئے ہیں۔ پولیس کاکہنا ہےکہ دھماکے کی اطلاع ملتے ہی ریسکیو ٹیمیں موقع پر پہنچ گئی ہیں اور زخمیوں کو اسپتال منتقل کیا جارہا ہے۔پولیس کے مطابق دھماکے کے بعد فائرنگ کی آوازیں بھی سنی گئی ہیں۔ترجمان محکمہ صحت کے مطابق کوئٹہ میں دھماکے کے پیش نظر سول اسپتال، بی ایم سی اسپتال اور ٹراما سینٹر میں ایمرجنسی نافذکردی کردی گئی ہے ۔ ترجمان نے بتایا کہ تمام کنسلٹنٹس، ڈاکٹرز، فارماسسٹس، اسٹاف نرسز اور پیرا میڈیکل اسٹاف اسپتالوں میں طلب کرلیا گیا ہے۔
ایکسپریس نیوز کے مطابق حالی روڈ پر دھماکے کی سی سی ٹی وی بھی سامنے آئی ہے جس میں زوردار دھماکے کے بعد جائے وقوعہ سے شعلے بلند ہوتے دیکھے گئے جب کہ قریب سڑک پر موجود کئی گاڑیاں بھی دھماکے کی زد میں آگئیں۔ بلوچستان کے صوبائی دارالحکومت کوئٹہ میں ہونے والے دھماکے کے سلسلے میں ابتدائی اطلاعات کے مطابق بھارتی پراکسی ’’فتنۃ الہندوستان‘‘کی جانب سے کیے گئے گاڑی کے حملے میں خودکش حملہ آور کے علاوہ 5 دہشت گرد ہلاک ہو گئے۔ حملے میں 2 ایف سی جوان زخمی ہوئے جب کہ تمام دہشت گردوں کو ہلاک کردیا گیا ہے۔ حملہ آور ایف سی کی وردی میں ملبوس تھے، جو سب کے سب ہلاک کردیے گئے۔
( بشکریہ : جیو نیوز / ایکسپریس نیوز )