کراچی : بابراعظم نے رواں سال کیلنڈر ایئر میں ایک ہزار رنز مکمل کر لیے ہیں، وہ 6 سال میں یہ اعزاز حاصل کرنے والے پہلے پاکستانی بلے باز ہیں۔پاکستانی کپتان نے یہ اعزاز کراچی میں انگلینڈ کے خلاف کھیلے جانے والے تیسرے ٹیسٹ میچ کے دوران حاصل کیا۔بابر اعظم ایک سال میں ایک ہزار رنز بنانے والے چھٹے پاکستانی بلے باز ہیں، ٹیسٹ میچ کی اننگز میں وہ 45 رنز پر پہنچے تو یہ اعزاز حاصل کیا، وہ 54 رنز بنا کر آؤٹ ہو گئے۔
بابر اعظم کی اچھی کارکردگی کے باوجود پاکستان کے سر پر پہلی بار ملک میں وائٹ واش کا خطرہ منڈلا رہا ہے۔بابر اعظم نے اب تک 8 ٹیسٹ میچوں میں 1009 رنز بنا رکھے ہیں جبکہ اگلے ہفتے نیوزی لینڈ کے خلاف ایک اور میچ کھیل کر اپنے مجموعی رنز میں اضافہ کرسکتے ہیں۔
آج کراچی ٹیسٹ میچ کا تیسرا دن تھا، جہاں پر پاکستان کو پہلی بار ملک میں کھیلی گئی سیریز میں تاریخ کی بدترین شکست کے خطرے کا سامنا ہے۔
انگلینڈ کے بلے باز جو روٹ رواں برس 15 ٹیسٹ میچوں میں 1098 رنز بنا کر 2022 میں سب سے زیادہ رنز بنانے والوں کی فہرست میں پہلے نمبر پر براجمان ہیں۔اس کے علاوہ رواں برس آسٹریلیا کے عثمان خواجہ نے 10 ٹیسٹ میچوں میں 1079 اور انگلینڈ کے بلے باز جونی بیرسٹو نے 10 میچوں میں 1061 رنز بنا رکھے ہیں۔
پاکستان کی جانب سے یونس خان نے یہ کارنامہ 2 بار انجام دیا ہے، انہوں نے 2006 میں 1179 اور 2014 میں 1064 رنز بنائے تھے۔
ایک سال میں ایک ہزار سے زائد رنز بنانے والے پاکستانیوں میں یہ کھلاڑی شامل ہیں، محمد یوسف نے 2006 میں 1788 رنز، انضمام الحق نے سال 2000 میں 1090 رنز، اظہر علی نے 2016 میں 1198 رنز اور محسن خان نے 1982 میں 1029 رنز بنائے تھے۔
کسی بھی بلے باز کی جانب سے ایک سال میں مجموعی طور پر سب سے زیادہ رنز بنانے کا ریکارڈ محمد یوسف کے پاس ہے۔
( بشکریہ : ڈان نیوز )