ملتان : گردوپیش ویب سائٹ کی اشاعت کا ایک سال مکمل ہو گیا ہے ۔ اس ایک برس کے دوران اس ویب سائیٹ نے بعض دیگر ویب سائیٹس کی طرح سنسنی خیز خبروں اور چونکا دینے والے موضوعات سے گریز کیا ۔ ہم نے مضامین کی بھر مار کرنے کی بجائے روزانہ تین سے چار مضامین کالم اور خبریں آپ کی خدمت میں پیش کیں ۔اس ویب سائیٹ نے سنجیدہ قارئین کو اپنی جانب متوجہ کیا ۔ ادب ، اور حالات حاضرہ کے علاوہ ثقافتی اور تحقیقی موضوعات کو بھی خصوصی اہمیت دی گئی ۔ ایک سال مکمل ہونے پر ہم یہاں ایک مختصر سا جائزہ شا ئع کر رہے ہیں تاکہ آپ ایک ہی نشست میں ہمارے سفر کا احوال جان سکیں ۔ اس ایک سال کے دوران ویب سائیٹ پر 1517پوسٹس ( تحریریں ) شائع کی گئیں جن میں اہم خبریں ،خواتین سے متعلق مضامین ،بچوں کےلئے کہانیاں ،اختصاریئے ،تنقیدی مضامین ،تاریخی وثقافتی موضوعات پرمضامین ،افسانے ،تجزیئے ،شاعری ،کالم ،کتابوں پر تبصرے ،کھیلوں سے متعلق مضامین شامل ہیں۔علاقائی رنگ کے عنوان سے تمام صوبوں اورکشمیر سے متعلق مضامین ،خبریں اورشاعری بھی گردوپیش میں شائع ہوئی۔تاریخی موضوعات پرمضامین بھی قارئین نے دلچسپی کے ساتھ پڑھے ۔ایک برس کے دوران گردوپیش پرشائع ہونے والی خبروں کی تعداد 431ہے ۔جن میں پہلی بریکنگ نیوز طیارے کے حادثے میں نامور گلوکار جنیدجمشید کی موت کے بارے میں تھی ۔یہ خبر مقبول ترین تحریروں میں بھی سال بھر سرفہرست رہی اوراس کا 6620 قارئین نے مطالعہ کیا۔گردوپیش کو اس عرصے کے دوران جن نامورلکھاریوں کی قلمی معاونت حاصل رہی ان میں محترم رضاعلی عابدی،ڈاکٹرحنیف چوہدری ،مستنصرحسین تارڑ،ڈاکٹرانواراحمد،ڈاکٹرصلاح الدین حیدر،اصغرندیم سید ،ڈاکٹرمختارظفر،ڈاکٹرشاہ محمد مری ،ڈاکٹرمبارک علی ،وسعت اللہ خان ،وجاہت مسعود،ڈاکٹرعباس برمانی ،لینہ حاشر ،عامرہاشم خاکوانی ،سیدمجاہدعلی ،سبط حسن گیلانی،ڈاکٹرعامرسہیل ،آسیہ رانی ،ظہوراحمد دھریجہ ،ڈاکٹرنجمہ شاہین کھوسہ ،سجادجہانیہ ،نوازش علی ندیم،مسیح اللہ جام پوری،اسدمحمودخان ،ڈاکٹرمقبول گیلانی ،غضنفرعلی شاہی ،پروفیسرانورجمال ،ڈاکٹراورنگزیب نیازی،ڈاکٹرشاہدہ دلاورشاہ ،ڈاکٹرعلمدارحسین بخاری ،زابرسعید بدر،شمیم عارف قریشی ،عابدمیر ،نصرت جاوید ،شاہدمجیدجعفری ،محمداسلام تبسم ،راﺅمحمد اسدکے نام قابل ذکرہیں۔اس کے علاوہ عمارغضنفر،صہیب اقبال ،ڈاکٹرقرة العین ہاشمی ،ڈاکٹرفرزانہ کوکب ،رضوان فیصل ،حناشہزادی ،سدرہ اشرف ،انیلہ اشرف ،علی عمران ممتاز، کمال ایوب صدیقی،منزہ اعجاز،منورآکاش،مہرسخاوت حسین ،محمودابڑو،محموداحمد چوہدری ،محمدعلی ایاز ،مجیداحمدجئی،فہیم عامر کی تحریروں نے بھی پڑھنے والوں کو اپنی جانب متوجہ کیا۔اس عرصہ کے دوران گردوپیش کو مجموعی طور پر 126لکھاریوں کی قلمی معاونت حاصل رہی ۔
فیس بک کمینٹ