ولنگٹن:( عمران عثمانی سے ) پاکستان کرکٹ ٹیم سال کی آخری ٹی20 سیریز 18دسمبر سے نیوزی لینڈ کے خلاف کھیل رہی ہے۔بابر اعظم کے زخمی ہونے کے بعد ٹیم کی پلاننگ کو دھچکا ضرور لگا ہے لیکن بہر حال انجریز بھی پارٹ آف گیم ہے اور کسی بھی ٹیم کو آخری حد تک کسی ایک کھلاڑہ پر اتنا انحصاربھی نہیں کرنا چاہئے کہ وہ زخمی ہوجائے تو ٹیم کو جیتنے کا یقین ہی نہ رہے۔
ورلڈ ٹی 20 کی تیاری اس وقت فوکس ہے لیکن 2017سے 2019تک مسلسل 11 ٹی 20 سیریز جیت کر 28ماہ تک ورلڈ رینکنگ میں پہلے نمبر پر رہنے والا پاکستان اس وقت چوتھی پوزیشن پر ہے،ماضی کی نسبت اب اپنی رینکنگ اور کارکردگی بہتر کرنے کا حقیقی وقت ہے کیونکہ 10 ماہ کی دوری پر موجود ورلڈ ٹی 20 کاریویو اسی سیریز سے شروع ہوچکا ہے۔پاکستان اور نیوزی لینڈ ٹی 20 سیریز کی مناسبت سے ذرا جائزہ لیتے ہیں کہ اس فارمیٹ میں دونوں ٹیموں کا ریکارڈ کیا ہے اور ٹیم کی اپنی پوزیشن کیسی ہے،پاکستان کو دنیائے کرکٹ میں سب سے زیادہ 157 ٹی 20ا نٹر نیشنل میچز کھیلنے کا تجربہ حاصل ہے اور سب سے ہی زیادہ 96 فتوحات اس کے نام کے آگے درج ہیں۔اسے 56 میچز میں ناکامی ہوئی ہے،پاکستان کا ٹی 20 انٹر نیشنل میں بڑا مجموعہ 205 اور کم اسکور 74 ہے،اس کے مقابلے میں نیوزی لینڈ کے 134میچز ہیں جو بہر حال ایک اچھی تعداد ہے لیکن اس کی کامیابیاں 63 میچز میں ہیں اور اس کی ناکامیاں 59ہیں،اس طرح نیوزی لینڈ کا ریکارڈ وفتح کا تناسب پاکستان سے کہیں کم ہے اور اسے پاکستان سے زیادہ شکستیں بھی ہوئی ہیں۔
نیوزی لینڈ کا ٹی 20 انٹرنیشنل میں بڑا مجموعہ243 اور کم سے کم 60 ہے۔
پاکستان اور نیوزی لینڈ کے باہمی مقابلوں کو دیکھا جائے تو گرین کیپس21 میچز کھیلے اور ان میں 13 فتوحات کے ساتھ وہ آگے ہے،بلیک کیپس کو اس کے مقابلے میں 8فتوحات نصیب ہوئی ہیں،نیوزی لینڈ کے خلاف پاکستان 201رنزبھی سیٹ کرچکا ہے۔
پاکستان اور نیوزی لینڈ میں 6 باہمی سیریز ہوچکی ہیں۔3سیریز میں پاکستان نے ٹرافی اٹھائی،2میں کیویز کے حق میں ٹرافی گئی جبکہ ایک سیریز برابر رہی۔پاکستان نے 2018میں نیوزی لینڈ میں اکلوتی باہمی ٹی 20 سیریز1-2 سے جیت رکھی ہے جبکہ میزبان ٹیم نے 2011 اور 2016میں کامیابی اپنے نام کی تھی۔نیوزی لینڈ میں کھیلے گئے 9میچز میں پاکستان نے میزبان ٹیم کو ٹف ٹائم دیا ہے کیونکہ اگر کیویز نے 5میچز جیتے ہیں تو پاکستان نے بھی 4میچز اپنے نام کررکھے ہیں۔گرین کیپس 25 جنوری 2018سے 4نومبر 2018تک کھیلے گئے آخری 5میچزمیں ناقابل شکست ہیں ،ان میں سے اس نے 3میچز عرب امارات اور 2نیوزی لینڈ میں جیتے ہیں ،ان میں ایک آک لینڈ میں تھا۔نومبر 2018کے بعد دونوں ٹیمیں پہلی بار ٹی 20 میں آمنے سامنے ہونگی۔
بیٹنگ میں نیوزی لینڈ کے مارٹن گپٹل15میچز میں 463 اور پاکستان کے محمد حفیظ14میچزمیں412رنزبناکر آگے پیچھے ہیں،کین ولیمسن 356رنزکے ساتھ تیسرے نمبر پر ہیں۔مارٹن گپٹل کی ناقابل شکست 87 اور بابر اعظم کی 79رنزکی اننگز باہمی مقابلوں کے ٹاپ انفرادی اسکور ہیں۔عمرگل کی 6رنزکے عوض 5 اور ٹم سائوتھی کی 18رنز دے کر 5وکٹیں بہترین انفرادی بائولنگ ہے ۔شاہد آفریدی نے 15میچز میں 21 اورٹم سائوتھی نے 11میچز میں 17وکٹوں کے ساتھ ٹاپ کر رکھا ہے۔
(بشکریہ: کرک سین)
فیس بک کمینٹ