تجزیےعمران عثمانیکھیللکھاری

کرکٹ کی متوقع سرگرمیاں : پاکستان کتنا متاثر ہو گا ؟ ۔۔ عمران عثمانی

پاکستان کرکٹ بورڈ پی ایس ایل کی عدم تکمیل پر اتنا پریشان نہیں ہے جتنی اسے پاکستان کے فیوچر ٹور پروگرام کے حوالے سے فکر ہے. کورونا اس وقت یورپ میں پنجے گاڑ چکا ہے ساتھ ہی انگلینڈ میں بھی ہرروز ہلاکتوں کی خبریں اور زیادہ تشویش پیدا کر رہی ہیں. پی ایس ایل ناک آوٹ رائونڈ کے ساتھ پاک بنگلہ دیش ٹیسٹ ملتوی ہوچکا ہے. پاکستان کی یہ پہلی انٹرنیشنل مصروفیات ہیں جو اب تک متاثر ہوئیں اس کے مقابلے میں دیگر ممالک جیسے بھارت،جنوبی افریقا،انگلینڈ، سری لنکا،آسٹریلیا ،نیوزی لینڈ،بنگلہ دیش،ویسٹ انڈیز، آئر لینڈ اور زمبابوے میں سے اکثر ممالک کی سیریز درمیان ہی میں ختم ہوئیں اور کئی کی اگلے ماہ غیر یقینی کا شکار ہیں.
پاکستان کرکٹ کی تھوڑی خوش قسمتی یہ ہے کہ اس کی اگلی بین الاقوامی مصروفیت اگلے 4 ماہ نہیں ہے لیکن اس کے بعد 3 سیریز اوپر تلے یورپ و انگلینڈ میں ہیں اور یورپی ممالک کی موجودہ پریشان کن صورتحال حوصلہ افزا نہیں لیکن چونکہ خاصا وقت درمیان میں ہے اس لئے خیال ہے کہ پاکستان کی دیگر ممالک کی طرح سیریز زیادہ متاثر نہیں ہونگی ۔
یاد رکھنے کی اہم بات یہ بھی ہے کہ انگلینڈ کرکٹ بورڈ پورے سیزن کی منسوخی سمیت تمام آپشنز پر غور کر رہا ہے اس لئے حتمی رائے قائم کرنا آسان نہیں ہے.
ہم قومی کرکٹ ٹیم کی انٹرنیشنل کمٹمنٹس کا جائزہ لیتے اور دیکھتے ہیں کہ کہاں کہاں کرکٹ کے سیریز متاثر ہوسکتی ہیں.
1.جولا ئی میں ہالینڈ میں 3 ایک روز ہ میچ.
2.جولائی ہی میں آئر لینڈ میں 2 ٹی 20میچ.
3.جولائی سے ستمبر میں انگلینڈ میں 3 ٹیسٹ میچ،3 ٹی 20 میچ
4.ستمبر میں ایشیا کپ پاکستان کی میزبانی کے تحت عرب امارات یا بنگلہ دیش میں.
5. اکتوبر میں جنوبی افریقا میں 3 ون ڈے اور 3 ٹی 20 میچ.
6.اکتوبر ،نومبرمیں آسٹریلیا میں ورلڈ ٹی 20 کپ .
7.نومبر دسمبر میں ہوم سیریز، زمبابوے کیخلاف 3 ون ڈے اور 3 ٹی 20 میچ.
8.دسمبر 2020 سے جنوری 2021، نیوزی لینڈ میں 2 ٹیسٹ اور 3 ٹی 20میچ
9.جنوری ،فروری 2021 میں ہوم سیریز، جنوبی افریقہ سے 2 ٹیسٹ اور 3 ٹی 20 میچ
10.فروری ،مارچ پاکستان سپر لیگ 6.
یہ پاکستان کا اگلے ایک سال کا فیوچر ٹورپروگرام ہے. اس میں روٹین کے اعتبار سے کہیں کوئی سیریز اضافی بھی رکھی جاسکتی ہے لیکن موجودہ حالات میں اضافہ تو دور کہیں نا کہیں کمی کے امکانات ہیں. پاکستان کو اسی دوران بنگلہ دیش ٹیسٹ بھی ری شیڈول کر نا ہے .دنیائے کرکٹ کے دیگر ممالک کے مقابلے میں پاکستان کی اگلی مصروفیات دور ہونے کی وجہ سے قدرے محفوظ ہیں لیکن اس کا انحصار دنیا میں جاری موجود ہ صورتحال پر ہے.

فیس بک کمینٹ
Tags

متعلقہ تحریریں

Adblock Detected

Please consider supporting us by disabling your ad blocker