کرکٹ بورڈز بھاری رقم رکھتے ہیں، بھارتی بورڈ دنیا کا امیر ترین کرکٹ ادارہ ہے.
یہ باتیں گاہے بگاہے پڑھنے اور سننے کو ملتی ہیں لیکن اس حوالے سے ایثار و قربانی کی مثالیں کم ہی سامنے آتی ہیں . کورونا کے سائے تلے زندگی گزارنے والی دنیا کو ابھی زیادہ طاقتور کرکٹ بورڈ بھارت کی جانب سے ایسی کسی بڑی کوشش کا ا نتظار ہے۔ ایسے میں پاکستان اور سری لنکن کرکٹ بورڈز سب سے بازی لے گئے ہیں.
سری لنکا کرکٹ بورڈ نے کورونا متاثرین کیلئے 25 ملین لنکن روپے کا اعلان کیا ہے. آئی لینڈرز میں اب تک 85 کورونا کیس رپورٹ ہوچکے ہیں. بورڈ نے حکومت کی مدد کے ساتھ ساتھ متاثرین کی نہ صرف مدد کی ہے بلکہ مزید متوقع کیسز کیلئے بجٹ مختص کیا ہے.
دوسری جانب پاکستان کرکٹ بورڈ نے سندھ حکومت کی درخواست پر حنیف محمد ہائی پرفارمنس سنٹر کراچی کو پیرا میڈیکل اسٹاف کے لیے عارضی قیام گاہ بنادیا ہے جہاں ایکسپو سنٹر کراچی میں قائم عارضی ہسپتال میں ذمہ داریاں نبھانے والا پیرا میڈیکل اسٹاف قیام کرے گا.
پاکستان کرکٹ بورڈ کے چیف آپریٹنگ آفیسر سلمان نصیر کا کہنا ہے کہ اس مشکل صورتحال میں اپنے فرائض منصبی ادا کرنے والے پیرا میڈیکل اسٹاف ہمارے ہیروز ہیں۔ انہوں نے کہا کہ اس شعبہ میں شامل تمام افراد اپنی جان جوکھوں میں ڈال کر کورونا وائرس کے مرض میں مبتلا شہریوں کی دیکھ بھال کررہے ہیں۔
فیس بک کمینٹ