شائقین کیلئے نیا کڑا،کرکٹ گراؤنڈز میں کورونا چیک پوائنٹس ،آئی سولیشن اسٹینڈز ۔۔عمران عثمانی

ایک وقت تھا ،کرکٹ آزاد تھی. گراؤنڈ میں موجود تماشائی اپنے ہیروز تک پہنچ جاتے تھے بلکہ وکٹ پر جا کر لیٹ بھی جاتے تھے. کھلاڑیوں سے لپٹ جاتے تھے. پھر ایک وقت آیا، دہشت گردی کے خوف سے گرائونڈز اور تماشائی آہنی حصار میں چلے گئے .پھر یہ حصار بھی ناکافی رہے اور پاکستان جیسے ممالک کے میدان سرے سے غیر آباد ہوگئے.سکیورٹی کے جدید آلات سے ایک مرتبہ پھر کرکٹ ،میدان اور عوام محفوظ ہونا شروع ہوئے اور رونقیں بحال ہونے لگیں تو اب ایک ایسا دشمن حملہ آور ہوا ہے جسے آہنی ہا تھ پکڑسکتے ہیں اور نہ کوئی تدبیر. چنانچہ ایک مرتبہ پھر دنیا ئے اسپورٹس پر تاریکی کا راج ہے.
ایسے میں ہم اب آنے والےوقت میں ایک نیا کام ہوتے دیکھیں گے.
انگلینڈ کے اس موسم گرما کے کرکٹ سیزن کے دوران انٹر نیشنل میچز میں گراؤنڈز کے باہر کورونا وائرس ٹیسٹنگ چیک پوائنٹس قائم کئے جانے کا انکشاف ہوا ہے، یہی نہیں بلکہ گراؤنڈز میں آئی سولیشن یونٹ بھی بنائے جائیں گے تاکہ حساس افراد کو وہاں رکھا جاسکے.
انگلینڈ کرکٹ سیزن پہلے ہی 28 مئی تک موخر ہے. جون تک انٹر نیشنل کرکٹ کونسل پابندی عائد کرچکی ہے جس کا سادہ سا مطلب یہ ہے کہ اگر حالات نے اجازت دی تو سیزن جولائی میں شروع ہوگا. ویسٹ انڈیز کی جون کی سیریز موخر ہوگی پاکستان انگلینڈ کی جولائی سیریز وقت پر کھیلی جاسکتی ہے مگر بات وہی کہ حکومت کی کلیئرنس اور حالات کی بہتری مشروط ہے
ای سی بی ترجمان کے مطابق سیزن کا بڑا حصہ بند گراؤنڈز میں کروانے کا فیصلہ بھی ہوچکا ہے. کم سے کم لوگوں کو ٹی وی پر براہ راست مقابلے دیکھنے کو ملیں ایسے میں نارمل حالات میں میچ کے دن گراؤنڈ میں کام کرنے والے 1500 افراد کم ہوکر 350 ہوجائیں گے.ویسٹ انڈیز، پاکستان،آسٹریلیا اور آئرلینڈ کے کھلاڑیوں واسٹاف ،انکی رہائش، سفر ودیگر معاملات کو سیٹ کرنا بھی بڑا چیلنج ہوگا. 1بلین پاؤنڈز سے زیادہ کی ڈیل بورڈ، براڈ کاسٹرز وپارٹنرز کیلئے نہایت اہم ہے لیکن زندگی سے نہیں. اسلئے تمام آپشن دیکھے جائیں گے.محدود اوور ز کی کرکٹ اور اسکے ساتھ 100 بالز ڈیبیو ایونٹ ترجیحات میں شامل ہیں.
انگلینڈ کرکٹ بورڈ کی مجوزہ پلاننگ کا اختتام کیا ہوگا یہ تو وقت بتائےگا لیکن آئندہ چند سالوں کیلئے یہ بات قریب طے ہوگئ ہے کہ دنیا کے کسی بھی گرائونڈ میں ہونے والے کرکٹ میچ کیلئے کورونا وائرس ٹیسٹنگ چیک پوائنٹس سے اب شائقین کو گزرنا ہوگا. سکیورٹی، کلیئرنس اور دیگر مراحل اپنی جگہ آنے والوں کیلئے چیلنج ہونگے.