اسلام آباد : صدر مملکت آج یوم آزادی کے موقع پر 304 پاکستانیوں اور غیر ملکیوں کو متعلقہ شعبوں میں نمایاں خدمات انجام دینے پر اعزازات سے نوازیں گے جس کیلئے تقریب 23 مارچ 2024 کو یوم پاکستان کے دن ہوگی۔
جن شخصیات کو اعزاز سے نوازا جائیگا اُن میں ایک موجودہ اور ایک سابق وزیر اعلیٰ، انٹیلی جنس بیورو اور پولیس کے انسداد دہشت گردی یونٹ کے افسران، ماہر تعلیم، سائنسدان، شاعر، صحافی اور اداکار وغیرہ شامل ہیں۔ سعودی وزیر دفاع اور معاون وزیر دفاع کے علاوہ چینی نائب وزیر اعظم اور سفارت کار کو بھی اعزاز عطا کیا جائے گا۔
پانچ پاکستانی شہریوں کو نشان امتیاز سے نوازا جا رہا ہے جن میں افتخار عارف (شاعر)، اصلاح الدین صدیق (سابق ہاکی کپتان)، سید قائم علی شاہ (سابق وزیراعلیٰ سندھ)، راجہ ظفر الحق (نون لیگ کے سینیٹر) اور ڈاکٹر شمشاد اختر (سابق گورنر اسٹیٹ بینک) شامل ہیں۔
جن شخصیات کو ہلال پاکستان دیا جائے گا اُن میں دوست ممالک کے دو معززین شہزادہ خالد بن سلمان بن عبدالعزیز السعود (سعودی وزیر دفاع) اور ہی لیفنگ (چینی نائب وزیراعظم) شامل ہیں۔
ستارہ پاکستان کا اعزاز سعودی عرب کے وزیر دفاع انجینئر طلال بن عبداللہ العتیبی اور ہلال قائداعظم چار چائنیز سفارت کاروں لو ژاؤہوئی، ننگ جیژے، نونگ رونگ اور شا زوکونگ کو دیا جائے گا۔
انسداد دہشت گردی کے 18 اہلکاروں کو ستارہ شجاعت دیا جا رہا ہے، ان میں سے 13 نے دشمن کیخلاف لڑتے ہوئے اپنی جان کا نذرانہ پیش کیا، باقی 5؍ جو حیات ہیں اور کامیاب آپریشنز کی قیادت کر رہے ہیں ان میں انٹیلی جنس بیورو کے 3؍ افسران طارق محمود (جوائنٹ ڈائریکٹر جنرل)، محمد عامر نسیم (ڈپٹی ڈائریکٹر جنرل) اور ماجد سلیم ملک (سینئر منیجر) شامل ہیں۔ دیگر 2؍ افراد پولیس سروس سے ہیں جن میں اختر حیات خان (آئی جی پولیس خیبرپختونخوا) اور مقدّس حیدر (ڈی آئی جی کراچی) شامل ہیں۔
بعد از مرگ ستارہ شجاعت سے نوازے جانے والے 13؍ اہلکاروں میں محمد یونس (کے پی سے پولیس کانسٹیبل)، نظام اللہ (کے پی پولیس سے بچانے والا)، راحت سلیم (کے پی سے پولیس کانسٹیبل)، غلام عباس (سندھ سے ہیڈ کانسٹیبل پولیس)، عبداللطیف (پولیس کانسٹیبل سندھ)، سعید احمد (سندھ سے لائف آپریٹر)، اجمل مسیح (سندھ سے سینٹری ورکر)، سپاہی محمد رمضان، سپاہی شمس اللہ، سب انسپکٹر محمد سہراب، پینٹر اسد اللہ خان، سپاہی اسرار محمد اور سب انسپکٹر ضیاء اللہ خان شامل ہیں۔
17؍ پاکستانیوں کو ہلال امتیاز سے نوازا جا رہا ہے جن میں ڈاکٹر مختار احمد (چیئرمین ہائر ایجوکیشن کمیشن)، راحت علی خان (معروف گلوکار)، محمد انور مسعود (لیجنڈری شاعر)، ڈاکٹر محمد امجد ثاقب (اخوت فاؤنڈیشن کے بانی)، مفتی عبدالشکور (مرحوم وزیر جو ایک سڑک حادثے میں انتقال کر گئے) اور دیگر شامل ہیں۔
50؍ کے قریب افراد کو ستارہ امتیاز دیا جائے گا جن میں فلم ڈائریکٹر سرمد سلطان کھوسٹ، بلال لاشاری، ستیش آنند کے علاوہ وزیراعلیٰ بلوچستان عبدالقدوس بزنجو، واصف ناگی (صحافی) وقار چوہان (ڈی جی نیب)، محسن حسن بٹ (ڈی جی ایف آئی اے)، مفتی منیب الرحمان، مرزا اختیار بیگ (کالم نگار)، نائلہ کیانی (کوہ پیما)، فہد ہارون اور دیگر شامل ہیں۔
جن 53؍ شخصیات کو پرائیڈ آف پرفارمنس دیا جائے گا اُن میں عنایت حسین بھٹی مرحوم، شازیہ منصور (گلوکار)، اداکار عجب گُل، عدنان صدیقی، حسن عسکری اور شیما کرمانی جیسے فنکار شامل ہیں۔
اسی طرح جن صحافیوں اور کالم نگاروں کو یہ ایوارڈ دیا جا رہا ہے ان میں خالد مسعود خان، سہیل وڑائچ، سلمان غنی شامل ہیں۔ بہادری کا اعزاز تمغہ شجاعت 21 افسران کو دیا جا رہا ہے اُن میں سے پانچ انٹیلی جنس بیورو سے ہیں۔
اُن کے نام یہ ہیں: فرمان اللہ (ڈائریکٹر)، بلال ریاض برکی (ڈائریکٹر)، سید عامر اختر (ڈائریکٹر)، عظمت علی شاہ (ڈپٹی ڈائریکٹر) اور مجیب اللہ (انسپکٹر)، سندھ پولیس کے پانچ، کے پی پولیس کے چار، بلوچستان اور پیرا ملٹری فورسز کے تین تین اہلکاروں کو یہ اعزاز دیا جا رہا ہے۔
دہشت گردوں کے خلاف کارروائیوں کے دوران شہید ہونے والے جن 6؍ اہلکاروں کو یہ اعزاز دیا جا رہا ہے اُن میں عبدالمالک کمانگر (انسپکٹر سندھ پولیس)، دین محمد (سب انسپکٹر سندھ پولیس)، جتوئی خان پتافی (کانسٹیبل سندھ پولیس)، محمد سلیم (کانسٹیبل سندھ پولیس) اور محمد بالاچ نوشیروانی (بلوچستان) شامل ہیں۔ تقریباً 118 شہریوں کو تمغہ امتیاز سے نوازا جا رہا ہے جن میں وزارت دفاع کے افسران، سائنسدان، فنکار، ماہرین تعلیم اور صحافی شامل ہیں۔
میڈیا سے تعلق رکھنے والی جن شخصیات کو یہ ایوارڈ دیا جا رہا ہے اُں میں امجاز عزیز ملک، غریدہ فاروقی، شمع جونیجو، وقار ستی، فاروق عادل، فہد حسین، سلیم بخاری اور جُگن کاظم شامل ہیں۔ تمغہِ ہدایت چار افراد کو جائے گا اُن میں عزیزہ شمی قدوائی، محمد عرفان صدیقی، کرامت اللہ چوہدری اور پروفیسر امجد شاد شامل ہیں۔
( بشکریہ : جیو نیوز )