ملتان : صحافتی اداروں میں ڈاؤن سائزنگ کا سلسلہ جاری ہے ۔ سوموار کے روز ملتان میں روزنامہ دنیا کے 80 سے زیادہ کارکنوں کو ملازمت سے برطرف کر کے روزنامہ دنیا ملتان سٹیشن کو بیورہ آفس میں تبدیل کر دیا گیا ۔دنیا اخبار میں ڈاؤن سائزنگ کے حوالے سے چہ میگوئیاں کئی روز سے جاری تھیںتاہم اس پر عمل درآمد 30 ستمبر کو کیا گیا ۔
سوموار کی شب روزنامہ دنیا کے تمام سٹاف کو الوداعی ڈنر پر مدعو کیا گیا تھا ۔ اس موقع پر انتظامیہ کی جانب سے کارکنوں کوان کی ستمبرکی تنخواہ کے علاوہ ایک اضافی تنخواہ اورپرا ویڈنٹ فنڈدیاگیاہے۔اب دنیا ملتان کے بیورو آفس میں چینل اور اخبار کے لئے ایک ساتھ کام ہو گا ۔
اخبار کے ریذیڈنٹ ایڈیٹر امجد بخاری کو بیورو چیف بنا دیا گیا ہے ۔ اخبار کے لئے ایک رپورٹرچینل کی ٹیم کے ساتھ مل کر کام کرے گا،ملتان کااخبار اب لاہورمیں تیارکیا جائے گا جس کے لئے وہاں ملتان ڈیسک قائم کر دیا گیا ہے ۔ تاہم ملتان کا پرنٹنگ پریس اب بھی موجودہے ۔اخبار سردست ملتان سے ہی چھاپاجائے گا۔اگلے مرحلے میں اخبار کی اشاعت بھی فیصل آباد منتقل کردی جائے گی ۔روزنامہ دنیا نے ملتان سے اشاعت کا آغاز دسمبر 2015 ء میں کیا تھا ۔