ملتان : اردو،سرائیکی کی معروف شاعرہ ،براڈکاسٹراور ریڈیوپاکستان کی کنٹرولر پروگرامزکوثر ثمرین نے سٹیشن ڈائریکٹر ریڈیوپاکستان ملتان کاچارج سنبھال لیا۔وہ ریڈیوپاکستان ملتان کی پہلی خاتون اسٹیشن ڈائریکٹر ہیں۔
کوثر ثمرین کاتعلق مظفرگڑھ سے ہے۔ انہوں نے ریڈیوپاکستان ملتان کے بچوں کے پروگرام سے اپنے براڈکاسٹنگ کیریئر کاآغاز کیا۔انہوں نے ملتان سے ایم اے اردو کیا جبکہ ایران سے فارسی میں ڈپلومہ حاصل کیا۔ریڈیوپاکستان ملتان کے علاوہ وہ ریڈیو پاکستان بہاولپور،اسلام آباد،راولپنڈی اور پشاور کے علاوہ پاکستان براڈ کاسٹنگ اکیڈمی میں بھی فرائض انجام دے چکی ہیں۔کوثر ثمرین چارکتابوں کی مصنف ہیں جن میں تین سے پر انہیں ایوارڈ مل چکا ہے۔وہ دومرتبہ ریڈیوپاکستان سے پی بی سی ایکسی لینسی ایوارڈ بھی حاصل کرچکی ہیں۔اس کے علاوہ پی ٹی وی اور ریڈیو کے لیے ڈرامہ نگار کی حیثیت سے بھی انہیں متعدد اعزازات سے نوازاگیا۔ وہ نومبر2019ءسے سنٹرل پروڈکشن اسلام آباد میں کنٹرولر پروگرامز کی حیثیت سے فرائض انجام دے رہی تھیں۔کوثرثمرین کی ملتان آمدپر ریڈیوپاکستان ملتان کے سٹاف نے انہیں خوش آمدید کہا اورپھول پیش کیے۔ان کے پیش رو آصف خان کھیتران ملتان میں ہی ڈپٹی کنٹرولر پروگرامز کی حیثیت سے فرائض انجام دیتے رہیں گے ۔
اے پی پی سے بات چیت کرتے ہوئے کوثر ثمرین نے کہا کہ میرے لیے خوشی کی بات ہے کہ وسیب کی بیٹی کی حیثیت سے مجھے اپنے خطے کی خدمت کاموقع مل رہا ہے۔ ملتان میرا ہمیشہ سے مرکزرہا۔ اسی شہر سے میں نے شاعری کاآغاز کیا اور یہیں سے براڈ کاسٹنگ کاسفر شروع ہوا۔ میرے لیے اس شہر میں آنا اعزاز کی بات ہے۔
فیس بک کمینٹ