لاہور : پاکستان کے کامیڈی کنگ امان اللہ خان کی وفات کے بعد سوشل میڈیا پر یہ افواہ گردش کر رہی ہے کہ ہاؤسنگ سوسائٹی کی انتظامیہ نے امان اللہ کو سٹیج ڈراموں میں کام کرنے کی وجہ قبر کی جگہ دینے سے انکار کیا۔سوشل میڈیا پر جمعے کی شام سے گردش کرنے والی افواہوں پر اردو نیوز سے بات کرتے ہوئے امان اللہ کی صاحبزادی زرغون امان اللہ نے ان خبروں کی تردید کی ہے جن میں کہا جا رہا ہے کہ سوسائٹی کی انتظامیہ نے ان کے والد کو قبر کی جگہ دینے سے انکار کیا۔
زرغون امان اللہ کا کہنا تھا کہ ’کسی نے یہ نہیں کہا کہ چونکہ امان اللہ خان سٹیج پر کام کرتے تھے اس لیے ان کو قبرستان میں جگہ نہیں دی جائے گی۔‘
ان کے مطابق ’ایسا کچھ نہیں ہوا ہے، یہ فیک نیوز ہے، ہم تین قبروں کی جگہ لینا چاہتے تھے کیونکہ ہم مزار بنانا چاہ رہے تھے لیکن سوسائٹی والے کہہ رہے تھے کہ ایک بندے کے لیے تین قبروں کی جگہ نہیں مل سکتی۔ بس یہی معاملہ تھا جسے وزیر اطلاعات نے حل کرایا۔‘
سوشل میڈیا پر مذکورہ جملوں کے ساتھ سوشل میڈیا پر ایک ویڈیو بھی شئیر کی جا رہی ہے جس میں پنجاب کے وزیر اطلاعات فیاض الحسن چوہان کو بھی دیکھا جا سکتا ہے۔
یہ ویڈیو سوسائٹی کے قبرستان میں بنائی گئی جہاں پر امان اللہ خان رہائش پذیر تھے۔ اس ویڈیو میں صوبائی وزیر اطلاعات سوسائٹی کی انتظامیہ کے افراد کو کہہ رہے ہیں کہ قبر کو وہیں بنایا جائے جہاں اسے کھودا جا رہا ہے۔
تاہم اس ویڈیو میں وہ الزامات دکھائی یا سنائی نہیں دے رہے جن کا ذکر اس ویڈیو کو شئیر کرنے والے صارفین اپنی تحریروں میں کر رہے ہیں۔
مبینہ طور پر پیراگون سوسائٹی کے قبرستان میں امان اللہ مرحوم کو دفنانے پر مسئلہ ھوا.
سوسائٹی کی سیکورٹی کے انچارج میجر ریٹائرڈ حنیف کو بھی سوشل میڈیا پر شیئر کی جانے والی ویڈیو میں صوبائی وزیر اطلاعات سے بات چیت کرتے ہوئے سنا اور دیکھا گیا ۔ اس معاملے پر ان کا کہنا ہے کہ قبر کے لیے جگہ نہ دینے کی خبر سراسر جھوٹی ہے ایسا ہو ہی نہیں سکتا جیسا بیان کیا جا رہا ہے۔
’میں خود سارے معاملے کو دیکھ رہا تھا۔ ہماری سوسائٹی کے قوانین ہیں جو قبرستان کے متعلق ہیں۔ ہر قبر کی جگہ گھروں کے نمبروں کی ترتیب سے ہوتی ہے۔ امان اللہ کی قبر جس جگہ بنائی جا رہی تھی وہ اس ترتیب سے نہیں تھی ہم نے درخواست کی کہ ایسا نہ کیا جائے لیکن ہماری نہیں سنی گئی۔ اس سے زیادہ کوئی معاملہ نہیں ہے جبکہ انھوں نے اپنے بیان میں صوبائی وزیر فیاضٰ الحسن چوہان پر الزام عائد کیا کہ وہ اسے مسئلہ بنا کر سیاسی رنگ دینے کی کوشش کر رہے ہیں۔‘
سوشل میڈیا پر قبر کی جگہ نہ دیے جانے کی خبروں کا سلسلہ اس وقت شروع ہوا جب جمعے کو صوبائی وزیر اطلاعت کی ٹیم نے ایک بیان جاری کیا کہ نجی ہاؤسنگ سوسائٹی نے معروف کامیڈین امان اللہ کو قبر کی جگہ دینے سے انکار کر دیا ہے۔
اس حوالے سے صوبائی وزیر فیاض الحسن چوہان نے سنیچر کو بھی ایک ویڈیو بیان جاری کیا ہے جس میں انھوں نے کہا کہ ’ذاتی دلچسپی سے معاملہ رفع دفع کروا دیا اور میں نے پاکستان کے لیجنڈ کی تدفین کو متنازع بنانے پر سوسائٹی انتظامیہ کی سرزنش کی۔‘
ان کے اس بیان کو سوسائٹی کی انتظامیہ کی جانب سے مسترد کرتے ہوئے قبر کی جگہ نہ دیے جانے کی خبروں کو منفی پروپیگنڈا قرار دیا ہے۔
( بشکریہ : اردو نیوز )
فیس بک کمینٹ