لندن : برطانیہ کی ملکہ الزبتھ دوم کی آخری رسومات کا سلسلہ شروع ہو گیا ہے۔ اتوار کو ملکہ کی میت بالمورل سے ایڈنبرا کے لیے میت گاڑی میں سفر پر روانہ ہوئی تو بڑی تعداد میں عوام سڑکوں پر نکل آئے ۔سوگواران کی بڑی تعداد خاموشی سے ملکہ کی میت کو جاتے ہوئے دیکھتی رہی ۔ ان کی میت کو شاہی معیار کے مطابق خاص انداز سے کپڑے میں لپیٹا گیا ہے۔
سکاٹ لینڈ میں بڑی تعداد میں عوام بادشاہ چارلس سوم کو بھی سننے کے لیے جمع ہیں۔خیال رہے کہ برطانیہ کی ملکہ الزبتھ دوم کی آخری رسومات ویسٹ منسٹر ایبی میں 19 ستمبر کو ادا کی جائیں گی۔چار دن تک عوام کو ان کی میت کے آخری دیدار کی اجازت ہو گی۔
اس سے پہلے ملکہ کی میت کو 12 ستمبر کو 24 گھنٹوں تک سینٹ جائلز کیتھیڈرل ایڈنبرا میں رکھا جائے گا جہاں لوگ انھیں خراج عقیدت پیش کرنے آ سکیں گے۔
ملکہ کی بیٹی پرنسز رائل (شہذادی این)، 175 میل کے سفر پر اس قافلے کی دوسری کار میں سفر کر رہی ہیں۔ ان کے ساتھ ان کے شوہر وائس ایڈمرل سر ٹم لارنس بھی موجود ہیں۔تابوت چھ گھنٹے کے کم رفتار سفر کے ساتھ ابرڈین اور ڈونڈی سے ہوتا تقریباً چار بجے ایڈنبرا پہنچا۔تابوت کی چادر پر ملکہ کے کچھ پسندیدہ پھول ہیں، جو سفید درانتی سے کاٹے گئے ہیں۔
جب یہ کارٹیج بالیٹر پہنچی تو آبرڈین شائر میں، جو بالمورل کا قریب ترین گاؤں ہے، سوگواروں نے سڑک پر پھول پھینکے۔
ان کا خاندان، سیاستدان اور عالمی رہنما ان کی آخری رسومات میں شرکت کریں گے جو 19 ستمبر کو برطانوی وقت کے مطابق دن 11 بجے ادا کی جائیں گی۔ اُس روز برطانیہ میں سرکاری چھٹی ہو گی۔بالمورل، ایبرڈین شائر سے جہاں ان کی وفات ہوئی ملکہ کا تابوت اتوار کو ایڈنبرا منتقل ہو جائے گا اور سہ پہر چار بجے تک ہولیروڈ ہاؤس کے محل تک جائے گا۔پیر کی سہ پہر یہ شاہی خاندان کے ارکان کے ہمراہ سینٹ جائلز کیتھیڈرل، ایڈنبرا تک جائے گا۔ وہاں ایک دعائیہ تقریب ہو گی اور تابوت 24 گھنٹے یہاں رہے گا تاکہ لوگ ان کی تعزیت کر سکیں۔
اگلے دن شہزادی این اپنی والدہ کی میت کے ساتھ واپس لندن جائیں گی۔ ملکہ کا تابوت ایڈنبرا ایئرپورٹ سے بکنگھم پیلس لے جایا جائے گا۔
بدھ کی سہ پہر اسے ویسٹ منسٹر ہال لے جایا جائے گا، سہہ پہر تین بجے ملکہ کا تابوت وہاں پہنچے گا۔ آخری رسومات سے قبل جمعرات کے بعد چار دن تک میت وہاں رکھی جائے گی۔
ریاستی طور پر آخری رسومات 19 تاریخ کو دن گیارہ بجے ہوں گی جس کے دوران شرکا ونڈزر کاسل تک ایک جلوس کی شکل میں پیدل جائیں گے، ملکہ کو ونڈزر میں کنگ جارج ششم میموریل چیپل میں سپرد خاک کیا جائے گا۔
آخری رسومات سے قبل نئے بادشاہ سکاٹ لینڈ، شمالی آئرلینڈ اور ویلز جائیں گے۔حکومت نے اعلان کیا ہے کہ قومی سوگ ریاستی سطح پر آخری رسومات کی ادائیگی تک جاری رہے گا۔ شاہی خاندان اس کے بعد مزید سات دن سوگ منائے گا۔ویسٹ منسٹر ایبی وہ تاریخی گرجا گھر ہے جہاں برطانیہ کے بادشاہوں اور ملکاؤں کی تاج پوشی کی جاتی ہے لیکن وہاں پر 18ویں صدی کے بعد سے کسی شاہی حکمران کی آخری رسومات ادا نہیں کی گئیں۔
1900 کی دہائی میں ملکہ کے والد، دادا اور پر دادی، ملکہ وکٹوریہ کی آخری رسومات ونڈسر کے سینٹ جارج چیپل میں ادا کی گئی تھیں۔ملکہ کی زندگی اور خدمات کی یاد میں دنیا بھر سے سربراہان مملکت کو شاہی خاندان کے ارکان کے ساتھ اس تقریب میں شامل ہونے کی دعوت دی جائے گی۔توقع ہے کہ برطانیہ کے سینیئر سیاستدان اور موجودہ اور سابق وزرائے اعظم بھی اس تقریب میں شامل ہوں گے۔ اس تقریب کو ٹیلی وژن پر نشر کیا جائے گا۔
( بشکریہ : بی بی سی اردو )
فیس بک کمینٹ