سرائیکی وسیب

خواجہ سرا فورم کا قیام خوش آئیند ہے ، اس طبقے کو نظر اندازکیا گیا : شاہ نواز خان

ملتان : معاشرے کے محروم طبقات کو ترقی کے مساوی مواقع فراہم کرنا ہم سب کی ذمہ داری ہے۔ محروم طبقات میں سب سے زیادہ متاثر طبقہ خواجہ سرا ہے جسے لوگوں کی نفرت بھری لیکن ہوس زدہ نگاہوں کا سامنا کرنا پڑتا ہے۔ جسمانی معذوری کا شکار یہ افراد معاشرہ کا اہم حصہ ثابت ہوسکتے ہیں لیکن اس کے لئے مربوط حکمت عملی کی اشد ضرورت ہے تاکہ اسکی اہمیت اجاگر ہوسکے۔
اس ضمن میں محکمہ سوشل ویلفئیر حکومت پنجاب ملتان اور آواز دو پروگرام کے زیر اہتمام خواجہ سراء فورم کی تشکیل خوش آئند امر ہے ۔ ان خیالات کا اظہار سوشل ویلفئیر آفیسر ملتان احمد چشتی نے آواز دو پروگرام کے تحت خواجہ سرا فورم سے خطاب کرتے ہوئے کیا۔ اس موقع پر صوبائی ہیڈادارہ استحکام شرکتی ترقی پنجاب شاہنواز خان نے کہا کہ خواجہ سراء فورم کے ذریعے ماہانہ بنیادوں پر مسائل کی نشاندہی اور ان کا مستقل حل کے لئے حکمت عملی ترتیب کی جائے گی ۔ خواجہ سرا کمیونٹی اس وقت بیشمار مسائل سے نبرد آزما ہے لیکن یہ امر خوش آئند ہے کہ حکومتی سطح پر ان مسائل کو سنجیدگی کے ساتھ حل کرنے کی کوششیں جاری ہیں ۔سرکاری سطح پر پنجاب میں پہلا خواجہ سراء تعلیمی ادارہ ملتان میں اپنی خدمات کا آغاز کرچکا ہے ۔ شناختی کارڈز کا اجراء مزید آسان کردیا گیا ہے ۔ اب ضرورت اس امر کی ہے کہ اس ضمن میں سماجی و رفاہی ادارے آگے آئیں اور حکومت کے معاون و ممد ثابت ہوں اسی مقصد کے حصول کے لئے خواجہ سراء فورم ملتان قائم کیا گیا ہے ۔ اس موقع گفتگو کرتے ہوئے خواجہ سرا کمیونٹی سے میڈم بلالی نے کہا کہ ماضی میں انتہائی بھیانک حالات دیکھے ہیں ۔ لوگوں کی نفرت انگیز نگاہوں کی بدولت ہمیں زندگی سے ہی نفرت ہونے لگی لیکن اب صورتحال میں کچھ بہتری آنے لگی ہے ۔ تعلیم کے ساتھ ساتھ ہنرمندی میں بھی خواجہ سرا آگے آرہے ہیں ۔ لیکن ہمارا طبقہ آج بھی بیروزگاری کا شکار ہے ۔ بھوک ، ننگ و افلاس کی بدولت بھیک مانگنے پر مجبور ہے ۔ فورم سے الگ الگ اظہار خیال کرتے ہوئے آواز ڈسٹرکٹ فورم ملتان کے صدر و تاجر رہنما خالد محمود قریشی ، ڈاکٹر فاروق لنگاہ، جواد امین قریشی ، خالد فیاض اور عبدالمطلب فرخ نے کہا کہ معاشرتی ترقی کے لئے لازم ہے کہ تمام طبقات کی عملی شرکت یقینی بنائی جائے ۔ خواجہ سراء ہوں یا افراد باہم معذوری، خواتین ہوں یا غیر مسلم افراد، ان طبقات کو قومی دھارے میں شامل کرنا ہوگا اور اس سلسلے میں محکمہ سوشل ویلفئیر اور ڈسٹرکٹ فورم کی جانب سے خواجہ سرا فورم کا قیام ایک اچھی کوشش ہے ۔ اس موقع پر ظفر شاہین، محمد عباس، منصور احمد ، بشریٰ خاتون سمیت خواجہ سرائوں کی بڑی تعداد موجود تھی ۔

فیس بک کمینٹ
Tags

متعلقہ تحریریں

Adblock Detected

Please consider supporting us by disabling your ad blocker