محبت ایک دن کی بات ہے یا عمر بھر کی ہے؟ رضی الدین رضی
مجھے میرے سوالوں پر ابھی خاموش رہنے دو
طوالت ہے مگر پھر بھی کہانی مختصر سی ہے
کہانی مختصر تو ہے کہانی معتبر بھی ہے
سبھی اس سوچ میں گم ہیں
محبت ایک دن کی بات ہے یا عمر بھر کی ہے؟
کہیں پر اعتبار ایسا کہ آنکھیں بند کر کے ہے
کہیںبے اعتباری اور وہ بھی عمر بھر کی ہے
ہیں کچھ کردار جن کی اب کہیں باری نہیں آنی
مگر وہ مرکزی تو ہیں
کچھ ایسے موڑ ہیں جن پر کہانی نے نہیں مڑنا
کہ جن پر اب نہیں رکنا
مگر سب رک کے مڑتے ہیں
کہیں کچھ راستے انجان اور ویران لگتے ہیں
مگر آباد رستے ہیں کہ جن پرچلنے والوں نے کبھی واپس نہیں آنا
مگر وہ ان پہ چلتے ہیں
بھٹک جاتے ہیں اور اک دوسرے سے پھر بھی کہتے ہیں
یہی رستہ محبت ہے
یہی رستہ حقیقت ہے
محبت ایک دن کی بات ہے یا عمر بھر کی ہے
کہانی بس مسافر اور اسی اندھے سفر کی ہے
رضی الدین رضی