ڈیرہ غازی خان (اے پی پی):کمشنرڈیرہ غازی خان لیاقت علی چٹھہ نے کہا ہے کہ شاعر اورادیب معاشرے کاچہرہ ہیں۔ یہ وہ لوگ ہیں جو اپنے اشعار کے ذریعے لوگوں کے دکھوں کو زبان دیتے ہیں۔
ڈیرہ غازی خان محبت کرنے والوں کی سرزمین ہے۔محسن نقوی، کیف انصاری کے بعد اب عزیز شاہد ہماری پہچان ہیں ۔ان خیالات کااظہارانہوں نے ڈیر ہ غازی خان جم خانہ کے زیراہتمام کل پاکستان مشاعرے سے صدارتی خطاب کے دوران کیا۔ مشاعرے کے مہمان خصوصی معروف شاعر اور کالم نگار خالد مسعود خان نے کہا کہ لیاقت علی چٹھہ مبارکباد کے مستحق ہیں کہ انہوں نے پہلے راجن پور اور اب ڈیرہ غازی خان میں جم خانہ قائم کیا جس کے نتیجے میں یہاں کی معاشرتی زندگی میں خوشگوارتبدیلی آئی ہے۔مشاعرے کے مہمانان اعزاز میں زاہد فخری ، شوکت فہمی، واجد امیر اور ڈاکٹرفخر عباس شامل تھے۔
اس موقع پر میزبانی کے فرائض مشاعرے کی آرگنائزر ڈاکٹر نجمہ شاہین کھوسہ نے انجام دیئے جبکہ شیراز غفور نے ان کی معاونت کی۔ اس موقع پرعزیز شاہد،رضی الدین رضی، شاکرحسین شاکر، ڈاکٹر غنی عاصم، سلیم فراز، نیئر رانی شفق، ڈاکٹر شاہینہ نجیب کھوسہ، بشری قریشی، ایمان قیصرانی، ثناءمحمد، شعیب ستار، رانا محمد یونس، شہبازاکمل نے کلام پیش کیاجبکہ نامور شاعر امجد اسلام امجد نے ویڈیولنک کے ذریعے خطاب کیا اور اپنا تازہ کلام سنایا۔ مشاعرہ رات گئے تک جاری رہااوراس میں جم خانہ کے اراکین کی بڑی تعداد نے شرکت کی۔
فیس بک کمینٹ