کوئٹہ : پاکستان کے صوبہ بلوچستان کے دارالحکومت کوئٹہ میں سرینا ہوٹل میں ہونے والے زور دار دھماکے میں کم از کم چار افراد ہلاک اور گیارہ کے زخمی ہونے کی اطلاعات ہیں۔
بی بی سی بات کرتے ہوئے بلوچستان کے وزیر داخلہ میر ضیااللہ لانگو نے اس کی تصدیق کرتے ہوئے بتایا کہ یہ دھماکہ سرینا ہوٹل کی پارکنگ میں ہوا ہے۔ انھوں نے بتایا کہ ابتدائی اطلاعات کے مطابق ’دھماکہ خیز مواد ایک گاڑی میں تھا‘۔ سول ہسپتال کوئٹہ کے ترجمان ڈاکٹر وسیم بیگ نے بتایا کہ دھماکے میں کم از کم چار افراد ہلاک اور دو اسسٹنٹ کمشروں سمیت 11 زخمی ہوئے ہیں۔تاحال ہلاک ہونے والے تمام افراد کی شناخت نہیں ہوئی ہے تاہم ہسپتال کے ترجمان کے مطابق ہلاک ہونے والوں میں سرینا ہوٹل کے گارڈز شامل ہیں۔
یہ دھماکہ ایک ایسے موقع پر ہوا جب چین کے سفیرکوئٹہ میں موجود ہیں۔تاہم بلوچستان کے وزیر داخلہ نے بتایا کہ چین کے سفیر اس موقع پر سرینا میں نہیں بلکہ کوئٹہ کلب میں تھے۔ سیرینا ہوٹل کوئٹہ کے ہائی سکیورٹی زون میں واقع ہے جس کے سامنے کوئٹہ کینٹونمنٹ، ساتھ میں بلوچستان اسمبلی اور بلوچستان ہائی کورٹ واقع ہے۔ چند سال قبل اسی علاقے میں آئی جی ایف سی کی رہائش گاہ کو بھی نشانہ بنایا گیا تھا۔
زخمیوں کو طبی امداد کیلئے سول اسپتال منتقل کر دیا گیا جبکہ اسپتال ذرائع کے مطابق زخمیوں میں سے 2 کی حالت تشویشناک ہے۔ پولیس کے مطابق دھماکے کے باعث پارکنگ میں کھڑی متعدد گاڑیوں میں آگ لگ گئی جس پر قابو پالیا گیا جبکہ ابتدائی تحقیقات کے مطابق دھماکا خیز مواد گاڑی میں نصب کیا گیا تھا۔ پولیس اور دیگر قانون نافذ کرنے والے اداروں نے دھماکے کے مقام کو گھیرے میں لے لیا ہے جبکہ جائے وقوعہ سے شواہد اکٹھے کیے جارہے ہیں۔ ذرائع نے بتایا کہ دھماکا اس قدر شدید تھا کہ دور دور تک آواز سنی گئی جبکہ دھواں اٹھتے بھی دیکھا گیا۔
( بشکریہ : بی بی سی اردو )