اسلام آ باد :وفاقی وزیر خزانہ اسحاق ڈار نے بتایا ہےکہ سعودی عرب نے اسٹیٹ بینک میں 2 ارب ڈالر جمع کروا دیے ہیں۔
اسلام آباد میں پریس کانفرنس کرتے ہوئے وفاقی وزیر خزانہ اسحاق ڈار کا کہنا تھا کہ دوست ملک سعودی عرب نے اسٹیٹ بینک میں 2 ارب ڈالر ڈیپازٹ کردیے ہیں۔
اسحاق ڈار کا کہنا تھا کہ میں وزیراعظم پاکستان، آرمی چیف اور اپنی طرف سے سعودی حکومت کا شکریہ ادا کرتا ہوں۔ وزیر خزانہ کا کہنا تھا کہ مستقبل میں معاشی معاملات میں مزید بہتری کی طرف جائیں گے، پاکستان کی معیشت پہلے سے بہتر ہے، جلد مزید استحکام پیدا ہوگا۔
خیال رہے کہ وزارت خزانہ اور آئی ایم ایف کےدرمیان ایکسٹرنل فنانسنگ کا معاملہ طے پاگیا ہے۔ذرائع وزارت خزانہ کے مطابق آئی ایم ایف نے وزارت خزانہ کے بھیجے گئے 8.2 ارب ڈالر کی فنانسنگ گیپ کا منصوبہ مان لیا ہے۔
ذرائع کے مطابق پاکستان کو آئی ایم ایف، عالمی بینک، ایشین ڈیولپمنٹ بینک، چین، سعودیہ اور یو اے ای سے فنانسنگ حاصل کرنی ہے جب کہ رواں مالی سال کے دوران چین سے 3.5 ارب ڈالر کی فنانسنگ کا انتظام کیا جائےگا۔وزارت خزانہ کے پلان کے مطابق سعودی عرب سے 2 ارب ڈالر کی فنانسنگ حاصل کرنی تھی۔
اس کے علاوہ یو اے ای سے ایک ارب ڈالر ، ایشیائی ترقیاتی بینک سے 50 کروڑ ڈالرکی فنانسنگ اور عالمی بینک سے 50 کروڑ ڈالرکی فنانسنگ حاصل کی جائے گی۔
ادھر سعودی عرب سے ڈالر وصول ہونے کے بعد پاکستان سٹاک ایکسچینج میں منگل کے روز تیز ی کا رجحان ریکارڈ کیا گیا ہے اور کے ایس ای 100 انڈیکس 45000 پوائنٹس کی حد عبور کر گیا۔مارکیٹ میں کاروبار کے آغاز سے لے کر اب تک 463 پوائنٹس کا اضافہ ہو چکا ہے اور اس وقت مارکیٹ کا انڈیکس 45049 پوائنٹس کی سطح پر موجود ہےجو 14 مہیینے کی بلند ترین سطح ہے۔
سٹاک بروکرز کےمطابق مارکیٹ میں صبح سے کاروبار کا آغاز مثبت تھا تاہم سعودی عرب کی جانب سے اسٹیٹ بینک آف پاکستان میں دو ارب ڈالر کی رقم کے جمع ہونے کی خبر کے بعد مارکیٹ میں مزید تیزی آئی۔سٹاک بروکرز کے مطابق سعودی دو ارب ڈالر کے ڈیپازٹ کے بعد پاکستان کے لیے آئی ایم ایف پروگرام کی ایگزیکٹو بورڈ سے منظوری کا امکان مزید بڑھ گیا ہے۔
( بشکریہ : بی بی سی اردو )