ملتان(عدنان فاروق قریشی سے )قادرپورراں کے علاقہ میں ز یادتی کا شکار ہونیوالی خاتون کا وقوعہ جھوٹا نکلا،خاتون ملزمان پر مقدمہ کرواکر فرار ہوگئی،پولیس نے خاتون کی تلاش کے لیے ٹیمیں تشکیل دیدیں ۔
قادر پور راں کے علاقہ موضع لوٹھر کی رہائشی 28 سالہ خاتون نے 18 اگست کو پولیس کو اطلاع دی تھی کہ وہ اپنے گھر میں موجود تھی کہ شہزاد نامی ملزم اپنے ایک نامعلوم ساتھی کے ہمراہ گھر داخل ہو گیا اور اس نے زبردستی اسے ز یادتی کا نشانہ بناڈالا۔واقعہ کی اطلاع ملتے ہی پولیس ٹیم موقع پر پہنچ گئی اور ملزمان کے خلاف تھانہ قادر پورراں میں مقدمہ درج کرلیا۔
ذرائع نے بتایا ہے کہ پولیس کی ابتدائی تفتیش سے معلوم ہوا ہے کہ مذکورہ خاتون کے شہزاد نامی شخص کے ساتھ مبینہ طور پر پہلے سے ناجائز تعلقات قائم تھے وقوعہ کے روز بھی ایف آئی آر میں نامزد ملزم شہزاد قابل اعتراض حالت میں موجود تھا کہ اسی دوران خاتون کا خاوند اظہر موقع پر پہنچ گیا۔پولیس ذرائع نے بتایا کہ دونوں میاں بیوی نے ملی بھگت کرکے شہزاد کو پھنسانے کے لیے پولیس کو اطلاع دی تاکہ اس سے بھاری رقم بٹوری جاسکے لیکن جیسے ہی وقوعہ کے اصل حقائق منظر عام پر آئے اسوقت سے متاثرہ خاتون پولیس کو چکمہ دیکر فرار ہوگئی ہے ۔
ڈی ایس پی مخدوم رشید سرکل سعادت چوہان نے رابطہ کرنے پر بتایا کہ وقوعہ کی میرٹ پر تفتیش کی جارہی ہے خاتون روپوش ہوگئی ہے۔خاتون کی تلاش کے لیے پولیس ٹیمیں بھی تشکیل دیدی گئی ہیں جو چھاپے مارنے میں مصروف ہیں اور بہت جلد خاتون کو ٹریس کرلیا جائیگا۔جبکہ دوسری جانب ملزمان نے ضمانت کروارکھی ہے۔دریں اثناء تین روز گزرنے کے باوجود بھی پولیس متاثرہ خاتون کا میڈیکل نہ کروا سکی ہے پولیس کا اس حوالے سے کہنا ہے کہ ڈاکٹرز کی عدم دستیابی کی وجہ سے پولیس کو میڈیکل کروانے میں شدید مشکلات کا سامنا ہے کیونکہ پولیس پہلے متاثرہ خاتون کو میڈیکل کے لیے مخدوم رشید،قادر پور راں اور قصبہ مڑل کے سرکاری ہسپتالوں میں میڈیکل لے جاچکی ہے لیکن تینوں ہسپتالوں میں لیڈی ڈاکٹرز موجود نہیں ۔