سکندر بوسن بھی پی ٹی آئی کو پیارے ہو گئے ؟

ملتان : مسلم لیگ ن کے رہنما اور نیشنل فوڈ سکیورٹی کے وزیر سکندر بوسن کے بارے میں اطلاعات گردش کر رہی ہیں کہ وہ بھی پی ٹی آئی کو پیارے ہو گئے ہیں‌۔ پاکستان تحریک انصاف کی مرکزی قیادت کے ساتھ ان کے معاملات طے پا گئے ہیں اور وہ دو تین روز میں باقاعدہ مسلم لیگ ن کو خیر باد کہہ دیں گے۔ذرائع کے مطابق پی ٹی آئی میں‌سکندربوسن کی شمولیت کے لئے جہانگیر ترین نے کردار ادا کیا ۔ تاہم سکندر بوسن نے کہا تھا کہ وہ وزیر اعظم شاہد خاقان عباسی کی وزارت عظمیٰ کے دوران پارٹی چھوڑنے کا اعلان نہیں کریں گے ۔ سکندر بوسن نے پیپلز پارٹی سے اپنی سیاست کا آغاز کیا ۔ وہ ہر الیکشن سے پہلے پارٹی تبدیل کرنے کی شہرت رکھتے ہیں ۔ سکندر بوسن پر ماضی میں جرائم پیشہ افراد کی سرپرستی کے الزامات بھی لگے۔ 1993 میں جب وہ رکن پنجاب اسمبلی تھے تو ان کے علاقے جھوک عاربی میں دو بہنوں سے زیادتی کا واقعہ پیش آیا تھا ۔ نوازشریف مظلوم بچیوں کی داد رسی کے کئے 13 جنوری کو موقع پر پہنچے تو اہل علاقہ نے سکندر بوسن پر الزام لگایا کہ وہ ملزمان کی سرپرستی کر رہے ہیں ۔ نواز شریف نے جلسے کے دوران سکندر بوسن کو سٹیج پر بلا کر سرزنش کی ۔تاہم بعد ازاں سکندر بوسن نے معافی مانگ کرمعاملہ رفع دفع کرایا ۔