اسلام آباد : پاکستان الیکٹرانک میڈیا ریگولیٹری اتھارٹی(پیمرا) نے کالعدم تحریک لبیک کی کوریج پر پابندی عائد کر دی ۔جمعرات کو پیمرا کی جانب سے جاری اعلامیے میں وزارت داخلہ کے 15اپریل 2021 کے اعلامیے کا حوالہ دیا گیا جس میں تحریک لبیک پاکستان کو کالعدم قرار دیا گیا تھا۔
اس حوالے سے کہا گیا کہ پیمرا کے ٹیلی ویژن براڈکاسٹ اسٹیشن آپریشن ریگولیشن 2012 اور الیکٹرانک میڈیا کے ضابطہ اخلاق 2015 کی شق 16 کے تحت تمام پروگراموں کو ملک کے قوانین پر عمل کرنا چاہیے۔پیمرا نے الیکٹرانک میڈیا کے ضابطہ اخلاق کی شق 3(3) کے تحت کالعدم تنظیموں کی نشریات پر پابندی عائد ہے۔میڈیا ریگولیٹری اتھارٹی نے اپنے بیان میں کہا کہ پیمرا آرڈیننس 2002 کی دفعہ 27 کے تحت درج اختیارات کا استعمال کرتے ہوئے ہدایات جاری کی جاتی ہیں کہ کالعدم تحریک لبیک پاکستان کی میڈیا کوریج روک دی جائے۔یہاں یہ بات قابل ذکر ہے کہ پیمرا نے رواں سال اپریل میں ٹی ایل پی کی میڈیا کوریج پر پابندی عائد کی تھی۔
فیس بک کمینٹ