ملتان : نامور شاعر بیاض سونی پتی کی 32ویں برسی کے موقع پر گردوپیش پبلی کیشنز کے زیراہتمام ان کا شعری مجموعہ ”بیاض کی بیاض سے“ شائع ہوگیا ہے۔ بیاض سونی پتی کا اصل نام محمد بیاض خان تھا۔ وہ14اپریل 1929ءکو سونی پت بھارت میں پیدا ہوئے۔ 17ستمبر1991ءکو ان کا کوٹ ادو میں انتقال ہوا۔
بیاض سونی پتی نے بہت سے مشاعروں میں شرکت کی۔انہوں نے کوٹ ادو میں کل پاکستان مشاعرے کروائے۔1973ءمیں ان کی کتاب ”انوار عزیزیہ “ شائع ہوئی ۔ان کامجموعہ کلام ”احساس کے انداز“ 1985ءمیں منظرعام پرآیا ۔ان کایہ شعر ضرب المثل کی صورت اختیار کرچکا ہے۔
احساس کے انداز بدل جاتے ہیں ورنہ
آنچل بھی اسی تار سے بنتا ہے کفن بھی
بیاض سونی پتی کاکلام ان کے بھائی اور معروف شاعر نیاز کوکب نے مرتب کیا لیکن وہ اسے اپنی زندگی میں شائع نہ کراسکے۔ اب یہ تمام کلام ”بیاض کی بیاض سے “ کے عنوان سے شائع ہوگیاہے۔ اسے ان کے رضاعی بیٹے محمدشاہ نوازخان نے ترتیب دیا ہے ۔ابتدائی ترتیب شاہ نواز کے والد محمد نیازخان کوکب نے دی تھی۔132صفحات پرمشتمل اس کتاب کی قیمت سات سوروپے ہے۔
فیس بک کمینٹ