ملتان : ایک ہی خاندان کے چھ افراد میں کورونا وائرس کے بعد علاقہ سیل کر دیا گیا ہے ضلعی انتظامیہ کے مطابق کورونا وائرس کے شکار افراد کو ریسکیو کرنیوالی ریپڈ ریسپانس ٹیم نے جمعرات کے روز کارروائی کرتے ہوئے جناح ٹاون کے رہائشی کورونا وائرس کے شکار مریض طاہر نواز کو طیب اردگان مظفر گڑھ شفٹ کر دیا ہے۔اس مریض کا ایک بیٹا،بھابی، دو بھتیجے اور ایک بھتیجی بھی کورونا وائرس کا شکار ہیں۔ بچوں اور بھابی کو نشتر ہسپتال شفٹ کر دیا گیا ہے ان مریضوں کو شیخ زید ہسپتال رحیم یار خان ریفر کر دیا جائے گا جہاں طاہر نواز کا بھائی پہلے ہی کورونا وائرس کی وجہ سے زیر علاج ہےاس واقعے کے نتیجے میں علاقے میں خوف و ہراس پھیل گیا ۔
اس کارروائی کے دوران جناح ٹاون کے متعلقہ ایریا کو سیل کر دیا گیا ہے جب کہ سٹریلائزیشن کے لئے ریسکیو 1122کی طرف سے کیمیکل کا سپرے جاری ہے۔علاقے میں آمدورفت روکنے کے لئے پولیس تعینات کر دی گئی ہے۔یاد رہے کہ کورونا کا مریض طاہر نواز 17 مارچ کو انگلینڈ سے لاہور پہنچا تھا اور وہ اپنی فیملی کے ہمراہ 18 مارچ کو ملتان پہنچا تھا۔علامت ظاہر ہونے پر طاہر نواز نے نشتر ہسپتال کے کورونا کاونٹر کا وزٹ کیا۔کاونٹر کے عملہ نے اسے گھر پر آئسولیشن اختیار کرنیکی ہدایت کی تھی۔طاہر نواز نے اپنی فیملی اور بھائی کے ہمراہ شیخ زید ہسپتال رحیم یار خان کا وزٹ بھی کیا جہاں طاہر نواز کے بھائی کو شیخ زید ہسپتال میں داخل کرادیا گیا جب کہ طاہر نواز خود واپس ملتان آ گیا اور گھر میں آئسولیشن اختیار کر لی تھی۔ڈپٹی کمشنر رحیم یار خان نے طاہر نواز کی بیماری اور ایڈریس کے بارے میں ڈپٹی کمشنر ملتان عامر خٹک کو تحریری طور آگاہ کیا اور اس خط کی بنیاد پر ریپڈ ریسپانس ٹیم نے بروقت کاروائی کرکے طاہر نواز کو ٹریس کیا اور ریسکیو1122 کے ذریعے رجب طیب اردگان ہسپتال شفٹ کردیا ہے۔
فیملی نے ایک نجی لیبارٹری سے ٹیسٹ کرائے ہیں جس میں طاہر نواز کے ایک بیٹے،بھابی، دو بھتیجے اور ایک بھتیجی بھی کورونا وائرس کا شکار بتایا گیا ہے۔اب مریضوں کو نشتر ہسپتال منتقل کردیا ہے جہاں سے انہیں شیخ زید ہسپتال رحیم یار خان ریفر کیا جائے گا جہاں ان کے ٹیسٹ دوبارہ ہونگے۔ایس او پیز کے مطابق جناح ٹاون کے ایریا کو مکمل طور پر لاک ڈاؤ ن کر دیا گیا ہے۔
فیس بک کمینٹ