ملتان:پاکستان کی ٹی 20 انٹر نیشنل میں 2 سالہ بادشاہت کا خاتمہ ہوگیا.جمعہ کو آسٹریلیا نے جنوبی افریقہ میں جاری ٹی 20 سیریز کا پہلا میچ جیت کر اپنی ریٹنگ پوزیشن 270 پوائنٹس کے ساتھ پاکستان کے برابر کردی لیکن میچز پوائنٹس اور ریٹنگ میں اعشاریہ برتری کے ساتھ وہ پہلے نمبر پر آگیا ہے.سیریز کے اگلے دونوں میچز میں فتح کے ساتھ وہ عالمی نمبر ون پوزیشن مزید مستحکم کرنے کی پوزیشن میں ہوگا تاہم ایک بھی شکست پاکستان کی نمبر ون پوزیشن بحال کردےگی.جو ہانسبرگ میں کھیلے گئے میچ سے قبل پاکستان 270 ریٹنگ کے ساتھ پہلے اور آسٹریلیا 269 کے ساتھ دوسرے نمبر پر تھا.
ٹی 20 ورلڈ کپ سے صرف 7 ما ە قبل بابر اعظم الیون کا پہلی پوزیشن کھودینا گرین شرٹس کیلئے بڑا دھچکا ہے اور آسٹریلیا کی طرف سے یہ سنگ میل عبور کرنا دنیائے کرکٹ کیلئے بڑے خطرے سے کم نہیں.ٹی 20 انٹرنیشنل میں کینگروز کی یہ مسلسل 8 ویں کامیابی بھی ہے.پاکستان نے جنوری 2018 میں نیوزی لینڈ کو شکست دیکر عالمی نمبر ون پوزیشن حاصل کی تھی جسے سرفراز کی قیادت میں 2019 کے آغاز تک مسلسل فتوحات کے ساتھ برقرار رکھالیکن پاکستان گزشتہ سال اس فارمیٹ میں مسلسل ناکام رہا جسکا خمیازہ سرفراز کو قیادت سے چھٹکارے اور پاکستان کو ٹی 20 کی شہنشاہیت سے محروم ہونے کی صورت میں برداشت کرنا پڑا ہے.
فیس بک کمینٹ