پنجاب

پنجاب کورونا سے سب سے زیادہ متاثر : پاکستان میں تعداد 1400 سے تجاوز

لاہور :پاکستان میں کورونا وائرس سے متاثرہ افراد کی تعداد 1415 ہو گئی ہے جبکہ 497 مصدقہ متاثرین کے ساتھ پنجاب پہلی بار ملک میں سب سے زیادہ متاثرہ صوبہ بن گیا ہے
پاکستان میں ہلاکتوں کی تعداد 11 ہے جن میں سے پانچ کا تعلق پنجاب، تین کا خیبر پختونخوا جبکہ ایک، ایک مریض سندھ، گلگت بلتستان اور بلوچستان میں ہلاک ہوا ہے تاہم 25 افراد صحت یاب بھی ہوئے ہیں۔
ملک کے چاروں صوبوں کے علاوہ دارالحکومت اسلام آباد، گلگت بلتستان اور پاکستان کے زیرِ انتظام کشمیر میں بھی مکمل یا جزوی لاک ڈاؤن ہے جبکہ ملک بھر میں فوج بھی تعینات ہے۔ حکومت نے چار اپریل تک ملک میں بین الاقوامی فضائی آپریشن معطل کر دیا ہے جبکہ ملک بھر میں ٹرین آپریشن بھی 31 مارچ تک بند کر دیا گیا۔
کورونا وائرس کے لیے وفاقی وزارت قومی صحت میں قائم نینشل کمانڈ اینڈ کنٹرول سینٹر کی جانب سے جاری کیے گئے سرکاری اعداد وشمار کے مطابق گذشتہ 24 گھنٹوں کے دوران پاکستان میں کورونا وائرس کا کوئی کیس رپورٹ نہیں ہوا۔
پاکستان کے دفتر خارجہ کی جانب سے ہفتے کے روز بتایا گیا کہ چین سے آنے والی خصوصی امدادی پروازوں میں کورونا وائرس کے علاج کی مہارت رکھنے والے آٹھ ماہرین بھی پاکستان پہنچ رہے ہیں۔یہ چینی ڈاکٹر دو ہفتے تک پاکستان میں رہیں گے اور اس دوران پاکستانی طبی ماہرین کو اپنے تجربے کی روشنی میں مشاورت فراہم کریں گے۔
پاکستان میں کورونا وائرس کا شکار افراد سے متعلق اعدادوشمار کے لیے ویب سائٹ کے مطابق کورونا وائرس کے سب سے زیادہ مریض پنجاب میں سامنے آئے ہیں جن کی تعداد 490 ہے۔سندھ میں 457 خیبرپختونخوا میں 180 بلوچستان میں 133، گلگت بلتستان میں 107 اسلام آباد میں 39 اور پاکستان کے زیرانتظام کشمیر میں دو مریض ہیں۔
ہفتے کو ایوی ایشن ڈویژن کے ترجمان عبدالستار کھوکھر کی جانب سے بتایا گیا کہ بینکاک میں پھنسے پاکستانی مسافروں کو وطن واپس لانے کے لیے حکومت پاکستان نے تھائی ایئرویز کو اسلام آنے کے لیے ایک فلائٹ آپریشن کی اجازت دینے کا فیصلہ کیا ہے۔ یہ اسلام آباد کے لیے خصوصی پرواز ہوگی جس میں 175 کے قریب مسافر ہوں گے۔
خصوصی پرواز 28 مارچ کی رات 10 بج کر 10 منٹ پر اسلام آباد انٹرنیشنل ایئرپورٹ پہنچے گی جہاں صحت کا عملہ مسافروں کی سکریننگ کو یقینی بنائے گا۔
پنجاب کے پرائمری اینڈ سیکنڈری ہیلتھ کیئر ڈیپارٹمنٹ کے مطابق 28 مارچ کی صبح تک صوبے میں کورونا کے 497 مصدقہ مریض موجود ہیں۔ صوبے میں کورونا سے اموات کی تعداد پانچ ہے جب کہ اب تک چار مریض صحت یاب ہو چکے ہیں۔
سنیچر 28 مارچ کی صبح دس بجے تک کے اعدادوشمار کے مطابق ڈی جی خان سے207 زائرین، ملتان سے 46 زائرین، لاہورمیں 116 افراد، گجرات میں 51، گوجرانوالہ 9، جہلم 19 اور راولپنڈی میں 15 مریضوں میں وائرس کی تصدیق ہوئی ہے۔ترجمان محکمہ صحت کے مطابق ملتان شہر میں 3، فیصل آباد 9، منڈی بہاوالدین 4، ناروال 1، رحیم یار خان 1 اور سرگودھا میں 2 مریضوں میں کورونا وائرس کی تصدیق ہوئی ہے۔ اٹک اور بہاولنگر میں ایک ایک، میانوالی میں 2 مریضوں میں وائرس کی تصدیق ہوئی۔ ننکانہ صاحب میں 2، خوشاب میں ایک، ڈی جی خان شہر میں 5 مریضوں میں کورونا وائرس کی تصدیق ہوئی۔

فیس بک کمینٹ
Tags

متعلقہ تحریریں

Adblock Detected

Please consider supporting us by disabling your ad blocker