امور خانہ داری کی ماہر زبیدہ آپا انتقال کر گئیں

کراچی : ٹی وی چینلز پر ٹوٹکوں اور امور خانہ داری کے حوالے سے شہرت حاصل کرنے والی زبیدہ آپا جمعرات کی شب کراچی میں انتقال کر گئیں ۔ ان کی عمر 72 سال تھی ۔ خاندانی ذرائع کا کہنا ہے کہ زبیدہ آپا گزشتہ کچھ عرصے سے علیل تھیں اور کراچی کے نجی ہسپتال میں زیر علاج تھیں۔زبیدہ طارق اپنے گھریلو ٹوٹکوں کی وجہ سے کافی مشہور تھیں اور انہیں ’زبیدہ آپا‘ کے نام سے پکارا جاتا تھا۔انہوں نے ٹی وی پر کئی شوز کرنے کے ساتھ ساتھ کھانے کی ترکیبوں اور ٹوٹکوں سے متعلق کئی کتابیں بھی تحریر کیں۔ زبیدہ آپا کی نماز جنازہ بعد نماز جمعہ سلطان مسجد ڈیفنس میں ادا کی جائے گی۔حیدر آباد دکن کی تعلیم یافتہ خاندان میں پیدا ہونے والی زبیدہ آپا 9 بہن بھائیوں میں سب سے چھوٹی تھیں۔زبیدہ طارق کی پیدائش چار اپریل 1945 کو حیدر آباد دکن میں ہوئی تھی اور قیام پاکستان کے بعد ان کا خاندان کراچی منتقل ہوگیا تھا۔ وہ نامور اردو مصنفہ فاطمہ ثریا بجیا اور مصنف انور مقصود کی بہن تھیں۔