پیدائشی شاعر وانقلابی میرے سب سے بڑے بیٹے اور وطن عزیز کے گنے چنے ماہرین سرطان بچگان میں ممیزوممتاز ڈاکٹر علی شاذف کا اولین شعری مجموعہ میرے ہاتھوں میں ہے۔میری سرخوشی و سرشاری اور تفاخروانبساط کے گلابوں کی خوشبو لفظوں کی باد صبا میں گھل کرچارسو پھیلتی محسوس ہو رہی ہے ۔۔۔
جناب رضی الدین رضی، سر پروفیسر انورجمال اورجناب ظہور چوہان نے جس انداز میں شاعر کے کلام وشخصیت پر تبصرہ کیا ھے اس کے بعد میں اپنی علمی و ادبی بے بضاعتی کے سبب کیا لکھ سکتا ھوں؟۔کتابوں سے بیزاری کے اس دور پرفتن میں ایک خوبصورت اور فکر افروز کتاب کا ظہور یقیناً ایک عظیم الشان کاوش ھے۔۔۔شاعر اور قارئین ادب کا امتحان بھی!!!
مجھے اپنے بینظیر معالج اور حق وصداقت کے علمبردار ،دکھی انسانیت کے غمگسارشاعر کا باپ ہونے پر فخرو ناز ھے۔
کتاب سے چند منتخب اشعار احباب کی ضیافت طبع کے لۓ پیش ہیں۔
سوگ کے شہر میں علی شاذف
جرم کرتا ہے مسکرانے کا
۔۔۔۔۔۔۔۔
دن کو چلتے ہیں جانب مقتل
شب کو ہم سوۓ دار ہوتے ہیں
۔۔۔۔۔۔۔۔۔۔۔
اپنے بچوں سے جب بچھڑتے ہیں
دل کے ٹکڑے ہزار ہوتے ہیں
۔۔۔۔۔۔۔۔۔۔۔۔
سچ بولنے سے سارا زمانہ ھے سیخ پا
مجھ پر تو میرا اپنا گھرانہ ہے سیخ پا
۔۔۔۔۔۔۔
جو ایک بات مجھے دلربا سے کرنا تھی
وہ بات دل میں رہی دل ربا کے ہوتے ہوۓ۔
۔۔۔۔۔۔۔۔
جوان ہوکے بغاوت تو ان کو کرنا تھی
وہ فاقہ کش تھے جو بچے غذا کے ہوتے ہوۓ
۔۔۔۔۔۔۔۔۔۔۔
مرا تو وقت رکا ہی نہیں علی شاذف
وگرنہ میں بھی کسی دشت میں اتر جاتا
۔۔۔۔۔۔۔۔۔۔۔
تری جلوہ نمائی عارضی تھی
تعجب ہے کہ حیرت مستقل ہے
۔۔۔۔۔۔۔۔۔
علی شاذف نظام زر رہے گا
تو پھر اپنی بغاوت مستقل ہے
۔۔۔۔۔۔۔۔۔۔۔
انقلاب ایک دن سمیٹے گا
بزم شاہی کے سب اجالوں کو
۔۔۔۔۔۔۔۔۔۔۔
لافتیٰ لکھو کتاب زیست میں
اور باب کربلا شامل کرو
۔۔۔۔۔۔۔۔۔۔
زندگی شاذف بڑی بے رنگ ہے
اس میں جینے کی وجہ شامل کرو
۔۔۔۔۔۔۔۔۔۔۔۔۔۔۔۔۔۔۔۔
یہ دنیا استعارہ ہے
ستارہ ہے ،سمندر ہے، کنارہ ہے
کسی مجبور نے اپنے خیالی دیوتاؤں کو خداؤں کو
کسی بیمار نے اپنے مسیحا کو پکاراہے
کسی نے رت جگے میں چاند آنگن میں اتارا ہے
کسی نے رات کی زلفوں کو اپنی زخمی پوروں سے سنوارا ہے
یہ دنیا استعارہ ہے۔۔۔۔۔۔
۔۔۔۔۔۔۔۔۔۔۔ ۔۔
اک طرف روشنیوں کے ہیں انبار
اک طرف حسرتوں کے ساۓ ییں
بس یہی فرق ہے ہمارے بیچ
تم نے خوش حالیاں سمیٹی ہیں
ہم نے رنج والم کماۓ ہیں۔
۔۔۔۔۔ ۔ ۔۔۔ ۔۔۔۔۔۔
کتاب حاصل کرنے کے لۓ اس نمبر پر وٹس ایپ یا کال فرمائیں
ادارہ گردوپیش
03186780423
فیس بک کمینٹ